«Пакуль Расея не прадэманструе, што яна зацікаўленая ў сурʼёзнай дыпляматыі, яна нікуды ня зрушыцца, — заявіў кіраўнік амэрыканскай дыпляматыі Энтані Блінкен газэце Wall Street Journal на Саміце рады кіраўнікоў (CEO Council Summit), арганізаваным выданьнем. — Калі і пры ўмове, што гэта адбудзецца, мы будзем першымі, хто будзе гатовы дапамагчы».
«У нейкім сэнсе выйсьце ёсьць заўсёды, і яно вельмі простае, — растлумачыў Блінкен. — Прэзыдэнт Пуцін пачаў гэтую вайну, і ён можа завяршыць яе заўтра».
«Мы сканцэнтраваныя на тым, каб і далей рабіць тое, што мы рабілі: гэта значыць, усё магчымае, каб ва Ўкраіны было ўсё неабходнае для самаабароны, усё, што ёй трэба для супрацьстаяньня расейскай агрэсіі, вяртаньня тэрыторый, захопленых пасьля 24 лютага, і таксама прымаць усе меры, каб яна атрымлівала эканамічную і гуманітарную падтрымку, каб справіцца з тым, што адбываецца ў краіне кожны дзень», — сказаў далей Блінкен.
Ён нагадаў, што прэзыдэнт Джо Байдэн неаднаразова казаў, што галоўны прынцып для ЗША — не рабіць ніякіх дзеяньняў, якія тычацца Ўкраіны, без удзелу Ўкраіны.
«І гэта азначае, што, перш за ўсё, украінцы прымаюць рашэньне, у якім кірунку яны хочуць рухацца, калі і як яны хочуць рухацца, але з нашай падтрымкай і падтрымкай дзясяткаў краін ва ўсім сьвеце», — сказаў дзяржсакратар.
Расея фактычна спрабавала сьцерці ідэнтычнасьць Ўкраіны
Паводле яго, Расея фактычна спрабавала сьцерці ідэнтычнасьць Ўкраіны як незалежнай краіны, зноў уключыць яе ў склад Расеі.
«Гэта ў іх не атрымалася і не атрымаецца, — сказаў Блінкен. — Тады яны заняліся захопам земляў, каб атрымаць як мага больш на паўднёвым усходзе Ўкраіны. — Гэтыя спробы цяпер таксама правальваюцца, паколькі, як мы бачым, зь лета ўкраінцы ўсё больш эфэктыўна даюць адпор. Таму цяперашняя мэта Расеі — перайсьці ў вайну з украінскім народам. Пуцін накіроўвае свой гнеў і агонь на цывільнае насельніцтва, спрабуючы вывесьці са строю энэргетычную інфраструктуру, адключыць цяпло, ваду, сьвятло, асабліва цяпер, калі ва Ўкраіне надыходзіць зіма».
«Таму галоўная задача для Ўкраіны цяпер — супрацьстаяць гэтаму і, вядома, працягваць рабіць тое, што яны робяць, гэта значыць вяртаць захопленыя ў іх зямлі», — заявіў высокапастаўлены ўкраінскі дыплямат.
Блінкен назваў расейскія ўзброеныя сілы «ў цэлым не зусім эфэктыўнымі падразьдзяленьнямі».
Паводле яго, Расея «спрабуе знайсьці выйсьце, фіктыўны выхад з сытуацыі ў стылі „О, давайце спынім агонь, давайце замарозім сытуацыю, атрымаем замарожаны канфлікт, ніколі ня будзем весьці перамовы аб захопленых тэрыторыях, будзем утрымліваць пазыцыі, адпачнем, перагрупуемся, а потым зноў нападзем“».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
