Лінкі ўнівэрсальнага доступу

Інстытут вывучэньня вайны: Шайгу прылятаў у Менск аказаць ціск на Беларусь, каб тая прымала большы ўдзел у вайне


Сяргей Шайгу, Віктар Хрэнін, Аляксандар Лукашэнка
Сяргей Шайгу, Віктар Хрэнін, Аляксандар Лукашэнка

Экспэрты інстытуту лічаць, што ні расейскія, ні ўкраінскія вайскоўцы не прыпыняць наступальныя апэрацыі зімой.

У Інстытуце вывучэньня вайны (ISW) заявілі, што кіраўнік Мінабароны РФ Сяргей Шайгу прыяжджаў у Менск, верагодна, для таго, каб аказаць ціск на міністра абароны Віктара Хрэніна, на Рэспубліку Беларусь у сытуацыі з падтрымкай вайны Расеі супраць Украіны. Масква зацікаўлена ў «больш канструктыўным супрацоўніцтве».

Шайгу таксама сустрэўся з Аляксандрам Лукашэнкам, падчас якой Лукашэнка заявіў, што беларускія і расейскія войскі працягваюць сумесныя трэніроўкі на беларускай тэрыторыі, каб «Саюзная дзяржава [магла] адбіць любую агрэсію». Верагодна, Шайгу сустракаўся з Хрэніным і Лукашэнкам у спробе аказаць ціск на Беларусь, каб тая падтрымала наступальную кампанію Расеі ва Ўкраіне. ISW раней ацэньваў, што Беларусь вельмі малаверагодна ўступіць у вайну ва Ўкраіне з-за ўнутраных фактараў, якія стрымліваюць жаданьне Лукашэнкі зрабіць гэта.

Экспэрты Інстытуту лічаць, што ні расейскія, ні ўкраінскія вайскоўцы не прыпыняць наступальных апэрацый зімой — аптымальны час для вайны з удзелам мэханізаваных падразьдзяленьняў.

Па паведамленьнях, украінскія войскі выйшлі на ўсходні бераг Дняпра насупраць Херсону.

Расейскія акупанты працягнулі наземныя атакі вакол Бахмуту, у раёне Аўдзееўкі-Данецку, а таксама ў заходняй частцы Данецкай і ўсходняй частцы Запароскай абласьцей.

Расейскі «Левада-Цэнтар» раней паведаміў, што ў лістападзе 74% расейцаў падтрымлівалі дзеяньні Пуціна ва Ўкраіне.

Масква з 24 лютага выкарыстоўвае Беларусь у якасьці пляцдарму для свайго ўварваньня ва Ўкраіну. Беларусь заявіла, што ня будзе ўступаць у вайну ва Ўкраіне, але Аляксандар Лукашэнка раней аддаў загад аб разьмяшчэньні войскаў каля ўкраінскай мяжы, спасылаючыся нібыта на пагрозы Беларусі з боку Кіева і Захаду.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG