Таксама, паводле агенцтва Reuters, адносіны паміж дзьвюма краінамі азмрочаныя рознагалосьсямі ў мностве пытаньняў — ад Тайваню да гандлю.
Два лідэры праводзяць першыя асабістыя перамовы з таго часу, як Байдэн стаў прэзыдэнтам. Сустрэча адбываецца на інданэзійскім востраве Балі перад самітам G20, які, як чакаецца, пройдзе у атмасфэры напружанасьці з прычыны ўварваньня Расеі ва Ўкраіну.
Лідэры ўсьміхаліся, цёпла паціскаючы адзін аднаму рукі перад шэрагам кітайскіх і амэрыканскіх сьцягоў у бальнай залі раскошнага гатэлю Mulia у бухце Нуса-Дуа на Балі.
«Проста прыемна вас бачыць», — сказаў Байдэн Сі Цзіньпіну, абняўшы яго і дадаўшы ў выступе перад журналістамі, што ён імкнецца падтрымліваць адкрытыя лініі сувязі на асабістым і дзяржаўным узроўні.
«Я лічу, што як лідэры нашых дзьвюх краін мы падзяляем адказнасьць за тое, каб паказаць, што Кітай і Злучаныя Штаты могуць даць рады нашым рознагалосьсям, не дапусьціць, каб канкурэнцыя... перарасла ў канфлікт, і знайсьці спосабы сумеснай працы ў неадкладных глябальных пытаньнях, якія патрабуюць нашай узаемнай супрацы».
Байдэн назваў зьмену клімату і адсутнасьць харчовай бясьпекі праблемамі, разьвязаньня якіх сьвет чакае ад дзьвюх дзяржаваў.
У адказ Сі сказаў, што адносіны паміж іхнымі краінамі не адпавядаюць глябальным чаканьням.
«Таму нам трэба намеціць правільны курс для кітайска-амэрыканскіх дачыненьняў. Нам трэба знайсьці правільны кірунак для разьвіцьця двухбаковых адносінаў і ўзьняць іх на новы ўзровень», — сказаў Сі.
«Сьвет чакае, што Кітай і Злучаныя Штаты будуць належным чынам рэгуляваць адносіны», — сказаў ён і дадаў, што зь нецярплівасьцю чакае сумеснай працы з Байдэнам, каб вярнуць адносіны ў правільнае рэчышча.
Ніводзін зь лідэраў ня меў маскі на твары для абароны ад COVID, хоць іх мелі чальцы дэлегацыяў.
Чакаецца, што асноўнымі тэмамі абмеркаваньня будуць Тайвань, Украіна і ядзерныя амбіцыі Паўночнай Карэі, пытаньні, якія таксама будуць дэбатавацца на саміце G20, які пройдзе без удзелу прэзыдэнта Расеі Ўладзіміра Пуціна.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў