«Расейцы цяпер перакідваюць туды пэўную колькасьць падразьдзяленьняў. Але тое, што яны заяўляюць, і тое, што яны перакідваюць фактычна, — гэта абсалютна розныя рэчы. Пакуль што няма ніякіх прыкмет стварэньня якога-небудзь фармату ўдарных груповак. На гэты момант расейцы завезьлі туды каля 3200 асобаў», — сказаў Кірыла Буданаў у інтэрвію ўкраінскаму выданьню «Українська правда».
Мінабароны Беларусі заяўляла, што расейскіх салдатаў прыбудзе каля 9 тысяч.
У той жа час кіраўнік украінскай выведкі падкрэсьліў, што патэнцыйна пагроза зь Беларусі застаецца. Пры гэтым Кірыла Буданаў зьвярнуў увагу на тое, што Расея перакідвае ў Беларусь толькі жывую сілу, бязь цяжкай тэхнікі.
«Яны бязь цяжкай тэхнікі. Наадварот, Беларусь усю сваю тэхніку з базаў доўгатэрміновага захоўваньня адпраўляе ў Расею. То бок фізычна чым яны з намі будуць зараз ваяваць? Я не разумею. І таксама не разумеюць яны», — адзначыў Кірыла Буданаў.
Генэральны штаб Узброеных сіл Украіны паведаміў, што адсочвае праверку мабілізацыйных рэсурсаў.
«Пры мясцовых органах выканаўчай улады створаны спэцыяльныя групы для праверкі і ўдакладненьня інфармацыі аб патэнцыйных „прызыўніках“. Ідзе ўдакладненьне роду дзейнасьці мужчын прызыўнога ўзросту, вайскова-ўліковых спэцыяльнасьцяў і сямейнага становішча», — адзначыў сьпікер украінскага Генштабу Аляксандар Штупун.
Паводле яго, з тэрыторыі Беларусі застаецца пагроза ракетных і авіяцыйных удараў, уключна з выкарыстаньнем бесьпілётнікаў іранскага паходжаньня.
Раней чытачы Свабоды паведамілі, што ў Беларусі тым, хто служыў у спэцназе і выведцы, прыходзяць позвы на вайсковыя зборы. У Аб’яднаным пераходным кабінэце гэта назвалі «схаванай мабілізацыяй».
У той жа час Аляксандар Лукашэнка, знаходзячыся 21 кастрычніка на агульнавайсковым палігоне Обуз-Лясноўскі ў Берасьцейскай вобласьці заявіў, што мабілізацыя ў Беларусі не адбываецца, вайна краіне не патрэбная.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
