Галоўнай мэтай вучэньня зьяўляецца «навучаньне органаў вайсковага кіраваньня Ўзброеных сіл, іншых войскаў і воінскіх фармаваньняў Рэспублікі Беларусь бесьперапыннаму кіраваньню сіламі і сродкамі пры выкананьні задач па прызначэньні», паведамляе прэс-служба Мінабароны.
Для адпрацоўкі практычных дзеяньняў войскаў на вучэньнях задзейнічаюць палігон «Берасьцейскі» і ўчасткі мясцовасьці ў Менскай і Віцебскай абласьцях. На вучэньнях будуць адпрацоўваць:
- вядзеньне баявых (спэцыяльных) дзеяньняў у вызваленьні тэрыторыі, часова захопленай супернікам;
- аднаўленьне кантролю над дзяржаўнай мяжой у зонах (палосах) адказнасьці аб’яднаньняў;
- авіяцыйную падтрымку войскаў;
- забесьпячэньне сілавых мераў ваеннага становішча, барацьбу з дывэрсійна-выведнымі групамі суперніка і незаконнымі ўзброенымі фармаваньнямі.
У ведамстве не называюць колькасьці вайскоўцаў і тэхнікі, якія ўдзельнічаюць у вучэньнях, толькі адзначаюць, што колькасьць войскаў, узбраеньня і вайсковай тэхнікі «не перавышае ўзровень, які падлягае абавязковаму апавяшчэньню ў адпаведнасьці з Венскім дакумэнтам 2011 году».
Таксама ў Мінабароны падкрэсьлілі, што запрасілі назіраць за актыўнай фазай вучэньняў прадстаўнікоў вайскова-дыпляматычнага корпусу замежных краін, «дэманструючы максымальную транспарэнтнасьць перад міжнароднай супольнасьцю».
Раней ва Ўкраіне выказалі занепакоенасьць гэтымі вучэньнямі. Паводле прадстаўніка Генштабу УСУ Аляксея Громава, ня выключана, што пад «вызваленьнем тэрыторыі, часова захопленай супернікам» могуць мецца на ўвазе прымежныя раёны Валынскай, Ровенскай і Жытомірскай абласьцей, бо гэта, паводле яго, «адпавядае канцэпцыі сумесных дзеяньняў узброеных сіл так званай „саюзнай дзяржавы“ на ўкраінскім кірунку».
Памочнік міністра абароны Беларусі ў пытаньнях міжнароднага вайсковага супрацоўніцтва Валер Равенка назваў заяву прадстаўніка Генштабу Узброеных сіл Украіны наконт беларускіх вайсковых вучэньняў правакацыйнай, «заведама лжывай заявай».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
