Літва зьбіраецца падоўжыць рэжым надзвычайнага становішча да 16 сьнежня
Чакаецца, што такое рашэньне будзе прынята 7 верасьня, піша BNS.
Раней рэжым надзвычайнага становішча раней быў працягнуты да 15 верасьня. Ён прадугледжвае абмежаваньні на распаўсюд расейскіх і беларускіх дзяржаўных радыё і тэлепраграм. Таксама забаронены сходы з мэтай падтрымкі ў любой форме і маштабе дзеяньняў Расеі і Беларусі.
Надзвычайнае становішча таксама прадугледжвае ўзмацненьне жорсткасьці візавага рэжыму, узмацненьне кантролю на мяжы.
Расейцам абмежавалі ўезд у краіны Балтыі
7 верасьня стала вядома, што краіны Балтыі дасягнулі пагадненьня аб абмежаваньні на ўезд расейцам з шэнгенскай візай. Пра гэта заявіў кіраўнік МЗС Латвіі Эдгарс Рынкевічс у Twitter.
Адпаведную інфармацыю таксама агучылі на прэс-канферэнцыі кіраўнікоў МЗС краін Балтыі і Паўночнай Эўропы.
«Краіны Балтыі дасягнулі дамоўленасьці аб істотным абмежаваньні (зь некаторымі выключэньнямі) перасячэньня мяжы грамадзянамі Расейскай Фэдэрацыі, якія маюць шэнгенскія візы ЭЗ. Рашэньні будуць прымацца нацыянальнымі ўрадамі ў адпаведнасьці з нацыянальнымі працэдурамі і ўступяць у сілу адначасова», — гаворыцца ў паведамленьні.
Чакаецца, што рашэньне набудзе моц 15 верасьня. Беларусаў яно не закране.
У выніку расейцы з шэнгенскімі візамі ня змогуць перасякаць сухапутныя межы краін Балтыі з боку Расеі і Беларусі. Выключэньне зробяць для кіроўцаў фур, дыпляматаў і тых, хто ўяжджае зь сямейных і гуманітарных прычынаў.
Латвія прыпыняе супрацоўніцтва зь Беларусьсю яшчэ ў дзьвюх сфэрах
Латвія з 9 верасьня зьбіраецца прыпыніць супрацоўніцтва зь Беларусьсю ў эканамічнай і навукова-тэхнічнай сфэрах. Такое рашэньне ў аўторак 6 верасьня прыняў Кабінэт міністраў Латвіі.
Пагадненьне паміж урадамі дзьвюх краін падпісалі 21 красавіка 2004 году ў Менску. Яго мэтай было стварэньне спрыяльных умоў для эканамічнага супрацоўніцтва, а таксама пашырэньне ўзаемаадносін у галіне эканомікі і тэхналёгій. Дамова датычылася прамысловай сфэры, турызму, транспарту, фармацэўтыкі, сельскай гаспадаркі, інвэстыцыйнай палітыкі, інавацый і г.д. Дзеяньне пагадненьня, згодна з рашэньнем ураду Латвіі, прыпыняецца з 9 верасьня 2022 году.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
