Лінкі ўнівэрсальнага доступу

Расея стварыла 21 фільтрацыйны лягер для ўкраінцаў, — Ейльскі ўнівэрсытэт


Ілюстрацыйнае фота. Пашкоджаны жылы будынак у акупаваным Марыюпалі
Ілюстрацыйнае фота. Пашкоджаны жылы будынак у акупаваным Марыюпалі

Дасьледчыкі знайшлі ў Данбасе фільтрацыйныя лягеры, выкарыстоўваючы матэрыялы з адкрытых крыніц. Украінцаў утрымліваюць там ва ўмовах антысанітарыі, нястачы ежы і вады, сьцьвярджаюць аўтары дакладу.

З сакавіка 2022 году Расея стварыла сама меней 21 фільтрацыйны лягер для ўкраінцаў у Данецкай вобласьці, сьцьвярджаецца ў дакладзе дасьледчыкаў Ейльскага ўнівэрсытэту. Дакумэнт апублікаваны на сайце праекту Conflict Obseratory, які падтрымлівае Дзярждэпартамэнт ЗША, піша DW.

Дасьледчыкі, выкарыстоўваючы інфармацыю з адкрытых крыніц і дадзеныя дыстанцыйнага зандаваньня, «з высокай ступеньню імавернасьці» вызначылі месцазнаходжаньні 21 фільтрацыйнага лягера. Яны дзеляць знойдзеныя аб’екты на чатыры асноўныя катэгорыі: пункты рэгістрацыі, месцы ўтрыманьня людзей, якія чакаюць рэгістрацыі, сьледчыя ізалятары і турмы, якія служаць месцам працяглага ўтрыманьня пад вартай.

«Затрыманьне цывільных асобаў бяз сувязі з вонкавым сьветам — гэта больш за парушэньне міжнароднага гуманітарнага права, — заявіў Кавэ Хошнуд, адзін з аўтараў дасьледаваньня. — Умовы ўтрыманьня пад вартай, задакумэнтаваныя ў гэтай справаздачы, як мяркуецца, уключаюць у сябе антысанітарыю, брак ежы і вады, абмежаваныя ўмовы і катаваньні», — адзначыў ён.

Аўтары дакладу патрабуюць забясьпечыць доступ незалежных назіральнікаў да апісаных у дакумэнце абʼектаў.

Акрамя гэтага, у дакладзе Ейльскага ўнівэрсытэту згадваюцца абʼекты, якія, імаверна, зьяўляюцца магіламі ваеннапалонных з калёніі ў Аленаўцы, дзе ў выніку выбуху ў канцы ліпеня загінулі 53 украінскія ваеннапалонныя. Масква і Кіеў ускладаюць адказнасьць за выбух адзін на аднаго.

Амбасада Расеі ў ЗША адрэагавала на даклад, назваўшы матэрыял «фальшыўкай». У дыпмісіі заявілі, што Дзярждэпартамэнт Злучаных Штатаў распаўсюджвае інфармацыю з мэтай дыскрэдытаваць дзеяньні вайскоўцаў РФ ва Ўкраіне.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG