Прысуд Аляксею Качанаву ў «справе Зельцара»
У Гомельскім абласным судзе адбыўся чарговы суд за камэнтары ў сацыяльных сетках пасьля гібелі ў менскай кватэры супрацоўніка КДБ Дзьмітрыя Федасюка і ІТ-спэцыяліста Андрэя Зельцара, піша «Вясна».
Судзілі 31-гадовага палітвязьня Аляксея Качанава паводле двух артыкулаў Крымінальнага кодэксу: 369 (абраза прадстаўніка ўлады) і 130 (распальваньне іншай сацыяльнай варожасьці). Суд праходзіў у закрытым рэжыме, таму падрабязнасьці справы невядомыя.
У выніку судзьдзя Вячаслаў Калюка асудзіў палітвязьня на адзін год і чатыры месяцы калёніі. Палітвязень ужо адбыў гэты тэрмін падчас сьледзтва — за кратамі ён знаходзіўся з 30 верасьня 2021 году. Таму пасьля прысуду Аляксея вызвалілі ў залі суду.
Студэнта, які прасіў выбарчыя камісіі лічыць галасы сумленна, пакаралі трыма гадамі турмы
Як піша «Вясна», палітвязьня Рамана Карпука асудзілі на 3 гады калёніі за рассылку лістоў сябрам камісій па рэфэрэндуме, які прайшоў у лютым 2022 году.
18-гадовы Раман Карпук заявіў у судзе, што толькі хацеў, каб галасы палічылі сумленна. Былога першакурсьніка абвінавацілі па ч. 2 арт. 191 Крымінальнага кодэксу (перашкода ажыцьцяўленьню выбарчых правоў, права на ўдзел у рэфэрэндуме) за адпраўку 99 лістоў сябрам камісій па рэфэрэндуме.
У Горадні пэнсіянэрку асудзілі на 2 гады «хатняй хіміі» за лайк карыкатуры на Лукашэнку
Cуд Кастрычніцкага раёну Горадні вынес рашэньне па справе Тацяны Мацяеўскай, якую абвінавацілі ў абразе Лукашэнкі паводле ч. 1 арт. 368 КК. Справу разглядаў судзьдзя Ўладзімер Пазьняк, паведамляе «Вясна».
Вядома, што абвінавачаная родам з Абхазіі. Жанчыне 61 год, яна ўжо на пэнсіі, але працуе санітаркай у мясцовым доме-інтэрнаце, дзе пра яе добра адгукаюцца і як пра чалавека, і як пра супрацоўніцу. Тацяну Анатольеўну абвінавацілі ў тым, што 12 жніўня 2020 году і 21 кастрычніка 2021 году яна лайкнула ў «Одноклассниках» карыкатуру на Лукашэнку.
Сваёй віны жанчына на судзе не адмаўляла, пры гэтым бок абвінавачваньня настаяў на тым, што гэта яшчэ і «працяглае злачынства». Нібы пасьля таго, як жанчына паставіла лайк, гэтая карыкатура пачала паказвацца яшчэ і на ейнай старонцы. Падчас спрэчак гэтую характарыстыку пракурор усё ж выключыў, запатрабаваўшы ў якасьці пакараньня для абвінавачанай 2,5 года «хатняй хіміі». У выніку судзьдзя прызначыў Тацяне Мацяеўскай 2 гады абмежаваньня волі без накіраваньня ў папраўчую ўстанову адкрытага тыпу.
Музыку Ігара Банцэра пакаралі яшчэ 15 днямі арышту
22 жніўня ў Цэнтральным судзе Менску прайшоў другі судовы працэс над Ігарам Банцарам паводле артыкула 19.11 КаАП (распаўсюд экстрэмісцкіх матэрыялаў). Яму зноў прысудзілі 15 дзён арышту, паведамляе «Вясна».
Банцэр меў выйсьці 19 жніўня пасьля 15 сутак, але гэтага не адбылося. Стала вядома, што яго перазатрымалі ў дзень вызваленьня паводле новай адміністрацыйнай справы. Выходныя ён правёў у ЦІПе ў чаканьні чарговага суду.
У Фаніпалі за ўдзел у пратэстах затрымалі трох чалавек
У Фаніпалі затрыманыя тры чалавекі за ўдзел у пратэстах у 2020 годзе, паведамляе Reform.by. «Пакаяльныя» відэа зьявіліся на адным з праўладных тэлеграм-каналаў. Сярод затрыманых — студэнт БДМУ і індывідуальны прадпрымальнік.
За відэа супраць расейскіх вайскоўцаў ГУБАЗіК затрымаў жанчыну, якая даглядае дзіця з інваліднасьцю
Праўладныя тэлеграм-каналы паведамляюць пра затрыманьне 40-гадовай Аляксандры Доўгай. Паводле іх, жанчына на сваёй TikTok-старонцы выклала відэа ў падтрымку Ўкраіны і супраць расейскіх вайскоўцаў.
Супраць яе могуць завесьці крымінальную справу паводле арт. 130 КК (распальваньне варожасьці), паведамляе «Вясна».
Галоўнага рэдактара «Народных навінаў Віцебска» Сержука Серабро выклікалі ў ГУБАЗіК
Пра гэта ён паведаміў на сваёй старонцы ў Facebook. Пасьля «даваньня тлумачэньняў» аб яго працы падчас «падзей 2020 году» Сяргея Серабро адпусьцілі з ГУБАЗіК.
«Я на волі. Усе норм. Ніякіх эксцэсаў не было, — напісаў журналіст у Фэйсбуку. — Даў „обяснение“, як асьвятляў падзеі 2020. „Попеняли“, што „ННВ“ малавата надаюць увагі праблемам злачыннасьці. Ня ведаю, наколькі сур’ёзна, бо, здаецца, у гэтым пляне мы ўперадзе ўсіх рэгіянальных СМІ. 8))».
Сержука Серабро ўжо затрымлівалі ў Віцебску ў лютым 2022 году. Міліцыянты цікавіліся, ці не зьбіраецца ён удзельнічаць у антываенных пратэстах. Пазьней яго вызвалілі без складаньня пратаколу.
Фатографа Сяргея Марозава аштрафавалі
Як паведамляе @pagoniagrodna, Сяргею «Баніфацыу» Марозаву прызначылі штраф за «экстрэмісцкія» падпіскі ў Instagram і вызвалілі. Яго затрымалі ўчора ў Горадні на аўтафэстывалі «Лякацыя».
Сяргей Марозаў — фатограф, вядомы ў тым ліку сваім здымкамі з дрона, кандыдат гістарычных навук. Звольніўся з горадзенскага ўнівэрсытэту ўвосень 2020 году пасьля 10 гадоў працы на знак салідарнасьці са звольненымі выкладчыкамі і адлічанымі студэнтамі.
Перастрэлка Андрэя Зельцара з групай КДБ. Што вядома
28 верасьня каля другой гадзіны дня супрацоўнікі КДБ у цывільнай вопратцы ўзламалі дзьверы і ўварваліся ў кватэру, дзе быў Андрэй Зельцар і ягоная жонка Марыя Ўсьпенская.
Паводле афіцыйнай вэрсіі, Зельцар двойчы стрэліў і сьмяротна параніў аднаго з групы КДБ. Супрацоўнікі КДБ застрэлілі яго ў адказ.
Жонку, якая здымала здарэньне на тэлефон, затрымалі за дапамогу ў забойстве.
Андрэю Зельцару быў 31 год.
У 2008 годзе ён скончыў тэхнікум бізнэсу і права. З 2016-га працаваў у Epam кіраўніком групы (team lead).
Захапляўся фэхтаваньнем, бегам па прыродным рэльефе, трыятлёнам.
Вядома, што ён плаціў дзяржаўнае мыта на права паляваньня. Гэта можа значыць, што стрэльбу ён меў законна, і пра гэта было вядома адпаведным службам. Мяркуючы па фота ў інстаграме Зельцара, марка стрэльбы — «ИЖ-27».
17 жніўня 2020 году ў сваім інстаграме ён заклікаў да ўсеагульнай забастоўкі і «ісьці да канца».
Ягоная жонка Марыя Ўсьпенская працавала ў сетцы крамаў побытавай хіміі, ёй 40 гадоў. У іх ёсьць сын, які нарадзіўся ў 2012 годзе.
Пра загінулага супрацоўніка КДБ спачатку афіцыйна паведамілі толькі пазыўны «Нірвана». У дзень разьвітаньня зь ім, 1 верасьня, з паведамленьня БелТА стала вядома, што яго імя Дзьмітры Федасюк, ён афіцэр групы «А» КДБ. Раней гэтыя зьвесткі неафіцыйна паведаміў ByPol. Федасюку быў 31 год. У яго засталіся жонка і малое дзіцё.
Праўладныя СМІ апублікавалі відэа зь месца здарэньня каля восьмай гадзіны вечара. Яно было змантаванае з запісаў дзьвюх камэр — з боку сілавікоў і з боку Зельцара. Сілавікі патлумачылі запіс з пакою Зельцара ягоным жаданьнем «хайпануць».
Некаторыя карыстальнікі сацыяльных сетак палічылі відэа пастаноўкай. У іншых на падставе паказаных кадраў узьніклі сумненьні ў афіцыйнай вэрсіі здарэньня. Выказваліся розныя меркаваньні: і што байца КДБ маглі сьмяротна параніць свае ж, і што Зельцар страляў траўматычнымі, а не паляўнічымі, кулямі (якія, аднак, зблізку таксама маглі нанесьці сьмяротнае раненьне).
