У сьпіс «агентаў» уключылі тэлевядоўцу Івана Урганта і ягонага «памагатага» — генэральнага дырэктара Першага каналу расейскай тэлевізіі Канстанціна Эрнста; рэжысэра Аляксандра Малочнікава і ягонага «памагатага», дырэктара Вялікага тэатру Ўладзіміра Урына, а таксама гурт «Бі-2» у якасьці «агента».
Першае пасяджэньне ГРАДу прайшло 3 жніўня. У ім узялі ўдзел сэнатары, дэпутаты ад розных партый, а таксама дзеячы мастацтва, напрыклад пісьменьнік Захар Прылепін, які кіраваў паседжаньнем.
Прылепін выказаў думку, што большасьць дзеячаў культуры ў Расеі занялі «антынародную пазыцыю» пасьля анэксіі Крыму ў 2014 годзе: «Лібэральныя мастакі» атрымалі занадта шмат свабоды, і ў выніку празь іх Захад згубна ўплывае на расейцаў».
Удзельнікі ГРАДу прапанавалі «зачышчаць» культурную прастору ад непатрыятычна настроеных дзеячаў. Больш падрабязна аб гэтым пасяджэньні расказала расейская служба Радыё Свабоды ў праграме «Чалавек мае права».
Як адзначае «Парламентская газета», 4 жніўня ўдзельнікі ГРАДу адправілі запыты кіраўніцтву Першага каналу, Вялікага тэатру, а таксама ў Мінкультуры, Мінлічбы і Мінспорту. Згодна з дакумэнтамі, ГРАД папрасіла разгледзець пытаньні аб спыненьні супрацоўніцтва з Ургантам, Малочнікавым і мастацтвазнаўцам Аляксандрам Васільевым і высьветліць абставіны запрашэньня «Бі-2» для выступленьня на Супэркубку Расеі-2022 у футболе.
«Усё тое, што выходзіць на вялікія экраны, сцэны, выставачныя залі, павінна быць пад кантролем дзяржавы, гэта відавочна», — так растлумачыў стварэньне сьпісу актор Дзьмітрый Пяўцоў.
Пазьбегнуць звальненьня Ургант, Малочнікаў і іншыя могуць, калі публічна падтрымаюць «спэцыяльную ваенную апэрацыю» ва Ўкраіне, — падкрэсьліў дэпутат Дзяржаўнай Думы Дзьмітрый Кузьняцоў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
