Свабода знайшла зьвесткі яшчэ пра двух грамадзян Беларусі, якія загінулі ва Ўкраіне.
«Паехаў на Данбас дапамагаць братам-славянам»
50-гадовы ўраджэнец Менску Аляксандар Шыянаў загінуў 30 чэрвеня. Пра гэта ў сацыяльных сетках пішуць сябры нябожчыка.
Шыянаў ваяваў ва Ўкраіне ад 2014 году. Паводле зьвестак ByPol, зьехаў туды ў канцы лістапада разам са сваёй знаёмай Людмілай Нехарошавай. Абое ўвайшлі ў вайсковыя фармаваньні «ДНР».
Ужо з усходняй Украіны Шыянаў дасылаў SMS свайму сыну ад першага шлюбу: «Я на Данбасе. Быў паранены. Цяпер усё добра. Сумую».
У Беларусь Шыянаў не вяртаўся. Пераехаў жыць у гарадок Узлавая Тульскай вобласьці, дзе зноў ажаніўся. Быў паходным атаманам «Вялікага брацтва казацкіх войскаў».
«Я не патомны казак. Уступіў у казацтва на Данбасе, куды езьдзіў дапамагаць братам-славянам. Да гэтага ўжо меў вялікі ваенны досьвед удзелу ў „гарачых пунктах“. Так што ішоў сьвядома і добраахвотна. Ваяваў у казацкіх падразьдзяленьнях», — казаў ён у інтэрвію выданьню «Наш Яснагорск».
Сябра Шыянава па «Вялікім брацтве казацкіх войскаў» Алег Канстанцінаў удакладняе, што беларус прайшоў празь абедзьве чачэнскія вайны. У Менску апошнія гады працаваў грузчыкам у дражджавым цэху.
Калі ў лютым пачалася новая вайна ва Ўкраіне, ён уступіў у казацкі атрад «Дон». Меў пазыўны «Рыкс».
«Вёў антыграмадзкі лад жыцьця»
Васілю Курловічу было 48 гадоў. Паведамленьні пра ягоную сьмерць у расейскіх пабліках у сацыяльных сетках зьявіліся яшчэ 23 сакавіка. Дадаткам ішлі фатаздымкі ягонага вайсковага білета, выдадзенага вайсковым камісарам «Луганскай народнай рэспублікі» 1 красавіка 2015 году.
Курловіч — ураджэнец Ваўкавыску. Быў намесьнікам камандзіра агнямётнага ўзводу. Старшы сяржант. Паводле зьвестак ByPol, Курловіч меў пяць судзімасьцяў за захоўваньне наркотыкаў.
«Курловіч браў удзел у пошуку і ліквідацыі дывэрсійных групаў. Апытаныя суседзі характарызуюць яго адмоўна: злоўжывае наркотыкамі, вядзе антыграмадзкі лад жыцьця», — гаворыцца пра яго.
Курловіч атрымліваў узнагароду з рук кіраўніка «ЛНР» Пасечніка «За ўдзел у Чарнухіна-Дэбальцаўскай апэрацыі».
Раней паведамлялася пра гібель ва Ўкраіне яшчэ шасьці вайскоўцаў, якія былі зьвязаныя зь Беларусьсю і ваявалі на баку Расеі: Пятра Лузанава, Паўла Яўглеўскага, Ільлі Курналёва, Уладзіслава Чарнова, Мікалая Маркава і Андрэя Бабко.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Ад пачатку паўнамаштабнага ўварваньня ва Ўкраіне загінулі як найменей 34 беларусы, якія змагаюцца за яе незалежнасьць.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- Паводле звестак ААН, у выніку паўнамаштабнай вайны каля 8 мільёнаў жыхароў Украіны сталі ўцекачамі.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- За шэсьць месяцаў вайны Расея змагла акупаваць каля 20% украінскай тэрыторыі. У сакавіку 2022 году плошча акупаваных зямель даходзіла да 30%. Аднак у канцы месяца расейскія войскі адступілі з поўначы Ўкраіны, а таксама з большай часткі Харкаўскай вобласьці. На канец жніўня цалкам акупаванымі былі Крым, Луганская і Херсонская вобласьці. А таксама 50% тэрыторыі Данецкай вобласьці, каля 70% Запароскай, прыкладна 30% Харкаўскай.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў