Лінкі ўнівэрсальнага доступу

Віцэ-прэм’ер Беларусі Снапкоў: Санкцыі маюць удушальны характар


Мікалай Снапкоў
Мікалай Снапкоў

Санкцыі, уведзеныя Захадам, маюць удушальны характар. Аб гэтым заявіў першы віцэ-прэм’ер Мікалай Снапкоў, выступаючы на ​​сумесным пасяджэньні Палаты прадстаўнікоў і Савета Рэспублікі.

«Новыя санкцыі, прымененыя да нашай краіны, носяць беспрэцэдэнтны маштаб, па вялікім рахунку ўдушальны характар. Канчатковая задума Захаду — нанесьці ўдар па ўзроўні жыцьця нашых людзей, выклікаць іх незадаволенасьць, сацыяльную напружанасьць праз паслабленьне патэнцыялу ключавых галін і сфэр эканомікі», — сказаў ён, словы Мікалая Снапкова перадае БелТА.

Чыноўнік зазначыў, што ўведзены санкцыі супраць беларускіх угнаеньняў, нафтапрадуктаў, іншых відаў прадукцыі. Сур’ёзны ўдар атрымала і авіяцыйная галіна.

«20% беларускай эканомікі непасрэдна пацярпелі ад санкцый, ускосна пацярпела астатняя частка эканомікі», — сказаў ён.

Першы віцэ-прэм’ер расказаў аб каналах уплыву санкцый. Размова ідзе аб прамых забаронах на экспарт, абмежаваньнях на пастаўкі тэхналёгій і абсталяваньня, што ў сярэднетэрміновай пэрспэктыве затармозіць разьвіцьцё. Яшчэ адзін канал — адключэньне ад SWIFT шэрагу буйных банкаў, забарона апэрацый з Нацыянальным банкам, абмежаваньне доступу на фінансавыя рынкі.

Дзяржава рызыкуе недаатрымаць 14 млрд даляраў экспартнай выручкі праз санкцыі і вайну ва Ўкраіне. Экспарт можа зьменшыцца на 30%. Кампэнсаваць страты ўрад мае намер павелічэньнем экспарту ў Расею на 40%.

Таксама Снапкоў зазначыў, што за чатыры месяцы дзяржаўная эканоміка недаатрымала 2,3% ВУП. Пры гэтым ён сказаў, што «нэгатыўны ўплыў недружалюбных дзеяньняў нарастае...»

Словы Снапкова пра вялікую шкоду санкцый ідуць насуперак словам іншых прадстаўнікоў улады. Раней Аляксандар Лукашэнка на сустрэчы з Пуціным у Сочы заявіў, што эканоміка Беларусі перажывае «неймавернае ўзмацненьне эканомікі», а прэм’ер-міністар Раман Галоўчанка 14 траўня ў інтэрвію тэлеканалу Al Arabiya заявіў, што «беларуская эканоміка адчувае сябе здаровай». Зрэшты, празь некалькі дзён Галоўчанка ўжо сказаў, што «санкцыі Захаду заблякавалі экспарт зь Беларусі ў ЭЗ і ЗША на $16-18 мільярдаў».

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG