Лінкі ўнівэрсальнага доступу

У Паўднёвай Асэтыі прызначылі дату рэфэрэндуму аб уваходжаньні ў Расею


«Прэзыдэнт» Паўднёвай Асэтыі Анатоль Бібілаў
«Прэзыдэнт» Паўднёвай Асэтыі Анатоль Бібілаў

У Паўднёвай Асэтыі, незалежнасьць якой ад Грузіі прызнаюць толькі некалькі краінаў сьвету, прызначылі на 17 ліпеня рэфэрэндум аб уваходжаньні ў склад Расейскай Фэдэрацыі.

Указ аб рэфэрэндуме падпісаны «прэзыдэнтам» самаабвешчанай Паўднёвай Асэтыі Анатолем Бібілавым. 8 траўня Бібілаў прайграў выбары на другі тэрмін сваёй пасады, яго паўнамоцтвы скончацца раней за прызначаную дату галасаваньня.

У тэксьце ўказу Бібілава гаворыцца, што галасаваньне праводзіцца ў сувязі з «гістарычным імкненьнем народу Рэспублікі Паўднёвая Асэтыя да ўзьяднаньня з Расеяй».

Калі галасаваньне адбудзецца, яно пройдзе прыблізна праз два месяцы пасьля таго, як на пасаду ўступіць пераможца выбараў 8 траўня Алан Гаглоеў. Ён лідэр партыі «Ныхас», якая выступае за незалежнасьць Паўднёвай Асэтыі. 11 траўня ў інтэрвію ТАСС ён ухіліўся ад ацэнкі ідэі далучэньня, заявіўшы, што рэфэрэндум можна правесьці, «калі прыйдзе час».

У 1922–1990 гадах Паўднёвая Асэтыя была аўтаномнай вобласьцю ў складзе Грузінскай ССР. У верасьні 1990 году народныя дэпутаты аўтаномнай вобласьці абвясьцілі незалежнасьць Рэспублікі Паўднёвая Асэтыя. З краінаў-чальцоў ААН гэтую незалежнасьць прызнаюць толькі Расея, Нікарагуа, Сырыя і Науру.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG