Марыюпальскія гарадзкія ўлады заявілі, што расейцы не змаглі правесьці парад у Марыюпалі і абмежаваліся ўскладаньнем кветак да мясцовага помніка.
Адначасова расейскія вайскоўцы працягваюць штурмаваць тэрыторыю заводу «Азоўсталь», дзе застаюцца ўкраінскія падразьдзяленьні Ўзброеных сіл і Службы бясьпекі, марскія пяхотнікі і памежнікі, якія адбіваюць атакі расейцаў.
Украінскія абаронцы знаходзяцца ў поўнай аблозе пад бесьперапыннымі абстрэламі і авіяналётамі. Паводле іх, калі Ўкраіна і міжнародныя арганізацыі не дамовяцца з Расеяй аб спыненьні агню і іхным выхадзе з гораду, то іх чакае гібель.
У той жа час, як паведаміў намесьнік камандзіра полку «Азоў» Сьвятаслаў Паламар у інтэрвію ВВС, яны не разглядаюць магчымасьці прарыву, бо на тэрыторыі заводу застаюцца параненыя і целы палеглых пабрацімаў.
«Параненых трэба як хутчэй эвакуаваць. Сёньня (8 траўня) зноў шмат забітых, параненых. Гэта наступствы дзеяньняў войскаў Расеі. У нас ужо няма хірургічных інструмэнтаў. Няма магчымасьці аказваць кваліфікаваную мэдычную дапамогу», — сказаў Сьвятаслаў Паламар.
Паводле яго, напярэдадні ўкраінскія вайскоўцы налічылі 25 вылетаў самалётаў, якія скідалі бомбы. Апроч таго, дадатковы агонь расейцы вядуць з танкаў і мінамётаў.
Намесьнік камандзіра полку «Азоў» паведаміў, што цяпер на тэрыторыі «Азоўсталі» знаходзіцца 600 параненых. Колькасьць загінулых ён адмовіўся ўдакладніць.
Сьвятаслаў Паламар таксама дадаў, што ўкраінскія вайскоўцы гінулі і ў часе так званай эвакуацыі, калі расейцы паабяцалі спыніць агонь.
«Два дні таму забілі трох нашых вайскоўцаў менавіта падчас рэжыму „спыненьня агню“, абвешчанага для эвакуацыі цывільных з „Азоўсталі“. Па машыне, якая мусіла забраць цывільных і адвезьці іх у месца прызначэньня, ударылі з ПЗРК. Адзін вайсковец загінуў, шасьцёра атрымалі раненьні, яшчэ двое загінулі ад бомбаў, скінутых з дрона. Гэта таксама было ў час спыненьня агню і эвакуацыі», — патлумачыў ён.
«Цяпер трэба дамагчыся рэальнага спыненьня агню, вывезьці адсюль параненых. Ім вельмі цяжка. Яны паміраюць ад недастатковага лячэньня. Тут няма магчымасьці аказаць ім нармальную мэдычную дапамогу. Наступнае — гэта экстракцыя, то бок вывад гарнізону або на тэрыторыю трэцяй краіны, або на тэрыторыю Ўкраіны. Гэтыя вайскоўцы, паверце, заслужылі гэтага. Гэтыя хлопцы зрабілі немагчымае ў такіх надзвычай цяжкіх умовах. Груба кажучы, з штых-нажамі хлопцы кідаюцца на самалёты і танкі. Я ня ведаю, ці былі ў гісторыі прэцэдэнты такога гераізму», — расказаў Сьвятаслаў Паламар.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
