«Я страціў усё, але я ня страціў Душу. Я не магу спакойна зарабляць у краіне, якая вядзе вайну з суседам, забіваючы мірных грамадзян і дзяцей, мне не патрэбныя ніякія падставы!» — напісаў бізнэсовец.
Напярэдадні Цінькоў распавёў у інтэрвію газэце New York Times, што прадаў сваю долю ў «Тинькофф банку» пад ціскам уладаў. Банкір сьцьвярджае, што на наступны дзень пасьля апублікаваньня паста ў Інстаграме (ён выклаў яго 19 красавіка), у якім выступіў з жорсткай крытыкай ваенных дзеяньняў расейскіх уладаў ва Ўкраіне, адміністрацыя прэзыдэнта Расеі Уладзіміра Пуціна зьвязалася з мэнэджмэнтам банку «Тинькофф» і прыгразіла нацыяналізаваць яго, калі Цінькоў не разарве зь ім сувязі.
На мінулым тыдні 35% акцый TCS Group Holding — галоўнай структуры расейскай групы «Тинькофф» — у сям’і Алега Цінькова купіла група «Интеррос». Банк Расеі ўхваліў гэтую ўгоду, яе парамэтры не раскрываюцца, аднак сам бізнэсмэн заявіў, што прадаў сваю долю «за капейкі». Цінькоў назваў угоду «адчайным распродажам, распродажам са зьніжкай», навязаным яму Крамлём.
Як сцвярджалі крыніцы выданьня «Коммерсант», прадстаўнікі Цінькова яшчэ ў другой палове сакавіка пачалі прапаноўваць расейскім удзельнікам фінансавага рынку яго долю за $300 млн. Па падліках РБК, з улікам кошту акцый TCS Group да моманту продажу, 35% Цінькова маглі б каштаваць $2,4 млрд.
