Адзін з нападнікаў крыкнуў: «Муратов, вот тебе за наших пацанов!»
Запіс нападу выклалі ў рэзэрвовым тэлеграм-канале «Саюзу дэсантнікаў». У пацярпелага дыягнаставалі апёк вачэй і каньюнктывы.
Пра тое, што за нападам на Дзьмітрыя Муратава стаяць расейскія спэцслужбы, паведамілі газэты The New York Times і The Washington Post са спасылкай на чыноўнікаў адміністрацыі прэзыдэнта ЗША Джо Байдэна.
Амэрыканская выведка не камэнтуе спосабы атрыманьня інфармацыі, спасылаючыся на неабходнасьць абараніць свае мэтады і крыніцы.
У публікацыі The New York Times гаворыцца, што выведка сьцьвярджае, што атрымала інфармацыю пра сувязь расейскіх спэцслужбаў з нападам «з розных крыніц». Справаздача выведкі была рассакрэчаная.
Якая менавіта расейская спэцслужба маецца на ўвазе ў дакумэнце, не ўдакладняецца. Абедзьве газэты называюць яе «выведкай», у асноўным такія функцыі ў Расеі выконваюць вайсковая выведка ГРУ, зьнешняя СВР і палітычная ФСБ.
Напад на Муратава ўчынілі, як мяркуецца, два чалавекі: адзін разьліваў фарбу, а другі здымаў гэта на відэа.
Паліцыі ўдалося затрымаць толькі другога зь іх — Ілью Маркаўца.
Згодна з расьсьледаваньнем «Новой газеты», непасрэдным выканаўцам быў 41-гадовы Мікалай Трыфанаў.
Ён часта ўдзельнічае ў афіцыйных мерапрыемствах Паветрана-дэсантных войскаў і пазыцыянуе сябе як вэтэран ПДВ, піша газэта, хоць і не служыў там.
