Супраць тых, хто скідаў фота і відэа ў тэлеграм-каналы «Беларускі Гаюн», Nexta, «Беларусь головного мозга», распачатыя крымінальныя справы паводле арт. 361-4 Крымінальнага кодэксу — садзейнічаньне экстрэмісцкай дзейнасьці, па якім затрыманым пагражае да шасьці гадоў зьняволеньня.
Праваабаронцы «Вясны» расказалі, што вядома пра затрыманых і пра крымінальныя справы супраць іх.
Паводле інфармацыі «Вясны», дыджытал-мастак Віктар Кулінка быў затрыманы 30 сакавіка. На праўладных тэлеграм-каналах зьявілася «пакаяннае відэа», дзе ён расказвае, што сфатаграфаваў калёну вайсковай тэхнікі расейскіх войскаў, якая накіроўвалася ў бок Гомля. Паводле яго слоў, фота ён перадаў у тэлеграм-канал «Беларускі Гаюн».
Сьцьвярджаецца, што Кулінка даслаў фота калёны вайсковай тэхнікі ў бот тэлеграм-каналу «Беларускі Гаюн», які 16 сакавіка быў прызнаны экстрэмісцкім фармаваньнем. Паводле папярэдняй інфармацыі, Віктару інкрымінуецца арт. 361-4 і арт. 361-1 Крымінальнага кодэксу (удзел у экстрэмісцкім фармаваньні) за рэгістрацыю ў «Пляне Перамога», якую сілавікі знайшлі ў тэлефоне.
У Сьледчым камітэце паведамілі, што абвінавачаньне ў садзейнічаньні экстрэмісцкай дзейнасьці прад’яўленае 28-гадовай маці непаўналетняга дзіцяці з Мазыра. Паводле вэрсіі абвінавачаньня, яна «зьняла відэа зь перамяшчэньнем верталётаў для ангажаванага дэструктыўнага рэсурсу». Цяпер жанчына ў сьледчым ізалятары Гомля. Паводле інфармацыі праваабаронцаў «Вясны», пад апісаньне падыходзіць Ганна Пышнік (Чымпаеш). Яе затрымалі за адпраўку відэа ў Nexta.
49-гадовую былую настаўніцу з Хойнікаў Ірыну Абдукерыну затрымалі раніцай 5 красавіка на лецішчы. Падставай для затрыманьня стала нібыта тое, што Абдукерына запісала на відэа перамяшчэньне калёны расейскай вайсковай тэхнікі і пераслала відэа ў тэлеграм-канал «Беларускі Гаюн». Пра гэта гаворыцца ў «пакаянным відэа» зь ёю. 10 красавіка жанчыне прадʼявілі абвінавачаньне адразу па двух артыкулах Крымінальнага кодэксу: 361-1 (удзел у экстрэмісцкім фармаваньні) і 361-4 (садзейнічаньне экстрэмісцкай дзейнасьці). Цяпер Ірына ў гомельскім СІЗА.
Супрацоўнікі ГУБАЗіКа затрымалі 1 красавіка 43-гадовага жыхара Гомля Алега Барадзіна, пра якога цяпер, меркавана, паведамляе СК. Прычына — мужчына зьняў на вакзале абласнога цэнтру відэа з вайсковай тэхнікай і адправіў «экстрэмісцкаму тэлеграм-каналу». «Пакаяннае відэа» зь ім зьявілася на праўладных тэлеграм-каналах. «Зрабіў відэа на вакзале Гомля з выявай вайскоўцаў Расейскай Фэдэрацыі і скінуў гэтае відэа ў чат-бот канала „Беларусь головного мозга“», — кажа на відэа мужчына.
Таксама фігурантам крымінальнай справы паводле арт. 361-4 Крымінальнага кодэксу стаў непаўналетні вучань прафэсійнага ліцэю. Паведамляецца, што ўраджэнец Мазыра скінуў у «экстрэмісцкі» канал відэа зь перамяшчэньнем вайсковай тэхнікі. Ён узяты пад варту. Прозьвішча і месцазнаходжаньне хлопца пакуль невядомыя.
У паведамленьні Сьледчага камітэту адзначаецца, што ў межах ч. 1 арт. 361-4 Крымінальнага кодэксу затрыманы 37-гадовы гомельскі таксіст і жыхар Гомля ва ўзросьце 30 гадоў. Іх прозьвішчы і месцазнаходжаньне таксама высьвятляюцца, паведамляе «Вясна».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.