На фатаздымку са спадарожніка, які зроблены 28 сакавіка ў 12.40 менскага часу, відаць як мінімум два асяродкі ўзгараньня непадалёк Рудога лесу — так называюць лес у радыюсе 10 км² ад Чарнобыльскай АЭС, на які ў 1986 годзе выпала найбольш радыяактыўнага пылу.
Прычына гэтага ўзгараньня невядомая, але па характары гарэньня падобна да падпалу сухой травы. Як бачна на здымку, вецер зносіў радыяактыўны дым у кірунку Брагінскага раёну Гомельскай вобласьці.
Таксама невядома, ці патушылі гэты пажар сёньня, 29 сакавіка.
У Міністэрстве аховы навакольнага асяродзьдзя і прыродных рэсурсаў Украіны заяўлялі, што чатыры дні таму зафіксавалі ў чарнобыльскай зоне 35 пажараў з павышэньнем радыяцыйнага фону.
Спэцыялісты сьцьвярджаюць, што такая колькасьць пажараў у сакавіку нехарактэрная для гэтага пэрыяду году і выкліканая менавіта баявымі дзеяньнямі, якія расейскія войскі працягваюць у гэтым рэгіёне з 24 лютага, і зьвязаным зь імі перасоўваньнем вайсковай тэхнікі.
Дзяржаўная служба Ўкраіны па надзвычайных сытуацыях паведаміла, што назапашваньне вайсковага арсэналу ў чарнобыльскай зоне становіць асаблівую небясьпеку.
«Ужо цяпер можна сказаць, што ў такіх умовах любы пажар у чарнобыльскіх лясах мае ўсе шанцы перарасьці ў маштабны пажар з катастрафічнымі наступствамі. Сытуацыю можна ахарактарызаваць як сядзеньне на бочцы з порахам, бо тушыць агонь на акупаваных тэрыторыях ня тое што праблематычна, але ўвогуле немагчыма», — заявілі ўкраінскія ратавальнікі.
Апошні раз маштабныя пажары ў зоне адчужэньня былі ў 2020 годзе. Тады, як падкрэсьлілі ў Дзяржаўнай службе Ўкраіны па надзвычайных сытуацыях, паратункам сталі самаадданая праца ўкраінскіх пажарных, авіяцыя і дождж. Тады выгарала большая частка Рудога лесу.
«Сёньняшнія ўмовы не дазваляюць залучыць ні асабовы склад, ні авіяцыю. А пра дождж будуць маліцца грамадзяне Беларусі, калі радыяактыўны агонь дасягне іхнай мяжы, зь якой яны запускаюць ракеты па Ўкраіне. Таму ратавальнікі падтрымліваюць патрабаваньне тэрмінова дэмілітарызаваць зону адчужэньня Чарнобыльскай АЭС і ўвесьці туды спэцыяльную місію ААН, якая зробіць немагчымым выкарыстаньне зоны расейскімі войскамі», — заявілі ўкраінскія ратавальнікі.
28 сакавіка віцэ-прэм’ер-міністар Украіны Ірына Верашчук заявіла, што Ўкраіна патрабуе ад Рады бясьпекі ААН тэрмінова зрабіць захады для дэмілітарызацыі зоны адчужэньня Чарнобыльскай АЭС і ўвесьці туды спэцыяльную місію ААН.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
