Прамым тэкстам ён не падтрымаў расейскага ўварваньня, аднак, па сутнасьці, прывёў свае аргумэнты для яго абгрунтаваньня.
Патрыярх заявіў, што цяперашняя сытуацыя, якую ён назваў «практычна пачаткам ваенных дзеяньняў», зьвязана з тым, што нейкія сілы восем гадоў спрабавалі зьнішчыць тое, што існуе ў Данбасе — відавочна, маюцца на ўвазе так званыя «ДНР» і «ЛНР».
Паводле Кірыла, там «існуе непрыманьне, прынцыповае непрыманьне так званых каштоўнасьцяў, якія сёньня прапануюцца тымі, хто прэтэндуе на сусьветную ўладу».
Галоўным тэстам на «пропуск» у сьвет «залішняга спажываньня, сьвет бачнай «свабоды», гэта значыць у заходні сьвет, патрыярх назваў правядзеньне гей-параду. «Патрабаваньні да многіх правесьці гей-парад і зьяўляюцца тэстам на ляяльнасьць таму самаму магутнаму сьвету», — сказаў Кірыл.
Паводле яго, «вакол гэтай тэмы сёньня ідзе рэальная вайна». «Хто нападае сёньня на Ўкраіну, дзе восем гадоў ідзе прыгнёт і зьнішчэньне людзей у Данбасе?» — задаў Кірыл рытарычнае пытаньне, але адказу на яго ня даў, дадаўшы, аднак, што «мы ўступілі ў барацьбу, якая мае не фізычнае, а мэтафізычнае значэньне». Ён таксама дадаў, што праваслаўныя «ня могуць ня быць» са сваімі братамі на Данбасе, і заклікаў разам зь імі маліцца за мір, згадаўшы зноў-такі Данбас, а не Ўкраіну.
«Адначасова мы павінны маліцца аб тым, каб як мага хутчэй наступіў мір, каб перастала ліцца кроў нашых братоў і сясьцёр, каб Госпад дабраволіў Сваю міласьць да шматпакутнай Данбаскай зямлі, якая восем гадоў нясе на сабе гэты журботны знак, які спараджае чалавечы грэх і нянавісьць», — казаў Кірыл.
Ён ня выказаў падтрымкі ўсёй Украіне, дзе цяпер існуе дзесяць тысяч парафій падпарадкаванай яму УПЦ МП, а мільёны вернікаў вымушаны пакутаваць. Жыхары гарадоў усходу і поўначы Ўкраіны, такія як Харкаў, Чарнігаў, Сумы ці Ахтырка, якія цярпяць найбольшыя разбурэньні, пераважна прыхаджане УПЦ Маскоўскага патрыярхату.
У казаньні Кірыла фактычна гучала падтрымка афіцыйнай вэрсіі Пуціна аб вайне супраць Украіны як быццам вымушаным кроку для выратаваньня Данбасу.
Як піша ВВС, вядомы праваслаўны мысьляр, протадыякан Андрэй Кураеў ужо назваў прамову патрыярха самай ганебнай у гісторыі.
«Патрыярх Кірыл прамаўляе самую ганебную са сваіх пропаведзяў. Яна ўвойдзе ў гісторыю як прыклад самай нізкай маніпуляцыі, — напісаў Кураеў. — Коратка: УС РФ ва Ўкраіне змагаюцца зь п*расамі. І прабачыць тут было б недарэчна...».
- У РПЦ неадназначнае стаўленьне да расейскага ўварваньня ва Ўкраіну. Шэраг сьвятароў падпісалі адкрыты ліст з заклікам да міру; іншыя стаяць на афіцыйнай пазыцыі расейскіх уладаў. Прадстаяцель Украінскай праваслаўнай царквы (Маскоўскага патрыярхату) мітрапаліт Ануфрый у першы дзень уварваньня рэзка асудзіў яго, назваўшы дзеяньні прэзыдэнта Расеі Ўладзіміра Пуціна аналягам братазабойства. У шэрагу эпархій УПЦ (МП) перасталі пры набажэнствах памінаць патрыярха Кірыла.
- Прэзыдэнт Украіны Уладзімір Зяленскі таксама выступіў у Даравальную нядзелю. «Мы не даруем сотняў і сотняў ахвяр. Тысяч і тысяч пакут. І Бог не даруе. Ні сёньня. Ні заўтра. Ніколі. І замест Даравальнага будзе Судны дзень», — заявіў прэзыдэнт Украіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.