Кіраўнік Народнага антыкрызіснага кіраўніцтва, былы чыноўнік і дыплямат Павал Латушка 2 сакавіка заклікаў кіраўніцтва ўсіх цывілізаваных краін сьвету і міжнародных арганізацый у тэрміновым парадку заявіць аб непрызнаньні Аляксандра Лукашэнкі прэзыдэнтам, а ягоны рэжым адкрыта назваць ваенным агрэсарам.
«Патрабую ўвядзеньня неадкладных магутных эканамічных санкцый — ідэнтычных і сынхранізаваных з санкцыямі супраць Расеі, якая разьвязала вайну з Украінай, — сказаў палітык. — Лукашэнка — прамы, актыўны і адзіны саюзьнік Расеі ў гэтай вайне. І сёньня Крэмль ня можа сабе дазволіць страціць свайго адзінага саюзьніка. Гэта тое, што стала б для яго надзвычай магутным ударам. Гэта выдатна разумеем мы, дэмакратычныя сілы Беларусі, гэта разумее Украіна, гэта разумее сам Пуцін, але не разумее Эўрапейскі зьвяз і ЗША».
Паводле Латушкі, афіцыйнае непрызнаньне Лукашэнкі прэзыдэнтам, непрызнаньне прызначанага ім ураду «з поўным разрывам любых дыпляматычных сувязяў зь ім, але не з краінай, адразу ж ператворыць яго ў поўны нуль у міжнародных адносінах». Гэта таксама «цалкам пазбавіць Пуціна магчымасьці фармальна прыкрываць сваю ваенную прысутнасьць і правядзеньне агрэсіі з тэрыторыі Беларусі згодай Лукашэнкі і яго ўраду».⠀
Палітык перакананы, што неабходна «выключыць усіх прадстаўнікоў Лукашэнкі зь міжнародных адносін і наднацыянальных органаў».
У той жа час «магутны пакет эканамічных санкцый» супраць банкаўска-фінансавай сістэмы, рэзерваў Нацбанку разам з адключэньнем Беларусі ад SWIFT і блякаваньнем доступу да рэсурсаў МВФ «дапаможа зьнішчыць Лукашэнку фінансава, пазбавіць яго магчымасьці падтрымліваць агрэсію Крамля». Аднак «ні першага, ні другога да гэтага часу так і не зроблена — ні з боку Эўразьвязу, ні з боку ЗША», заявіў ён.
«Я не прашу — я патрабую ад вас рашучых дзеяньняў. Вайна ўжо ідзе. І цяпер яна правярае на рашучасьць увесь цывілізаваны сьвет. Час дзейнічаць», — заклікаў Латушка.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
