Лінкі ўнівэрсальнага доступу

Пікет у падтрымку Ўкраіны падчас галасаваньня ў Заслаўі (Менская вобласьць) 27 лютага
Пікет у падтрымку Ўкраіны падчас галасаваньня ў Заслаўі (Менская вобласьць) 27 лютага

Рэфэрэндум-2022: беларусы выйшлі з пратэстам — 500 затрыманых. Хроніка дня

абноўлена

27 лютага ў Беларусі праходзіць рэфэрэндум аб Канстытуцыі, прапанаванай Лукашэнкам. Пры гэтым праваабаронцы заяўляюць пра шматлікія парушэньні ў працэсе галасаваньня. Улады не адкрылі ўчасткаў за мяжой, пазбавіўшы права галасаваць сотні тысяч грамадзян. У самой краіне антываенны пратэст.

10:23 28.2.2022

У МУС паведамілі пра амаль 800 затрыманых пасьля рэфэрэндуму

У сваім паведамленьні МУС напісаў, што «нягледзячы на заклікі дэструктыўных тэлеграм-каналаў, масавымі пратэставыя акцыі не атрымаліся». Там нагадалі, што заведзены крымінальныя справы па артыкуле 342 КК за грубае парушэньне грамадзкага парадку і арганізацыю масавых несанкцыянаваных акцый і нібыта затрыманыя датычныя да гэтага людзі.

Праваабаронцы ведаюць 530 прозьвішчаў затрыманых на антываенных акцыях людзей.

02:26 28.2.2022

Улады назвалі першыя вынікі «галасаваньня»​

Згодна з папярэднімі дадзенымі, удзел у рэфэрэндуме прынялі 5359471 чалавек, або 78,63% грамадзян Беларусі, уключаных у сьпісы для галасаваньня. За ўнясеньне зьмен і дапаўненьняў у Канстытуцыю Рэспублікі Беларусь прагаласавала 4 440 813 чалавек, ці 65,16% ад агульнай колькасьці ўдзельнікаў. Супраць – 686 165 чалавек ці 10,07%, паведамляе БелТА.

Калі падлічваць вынікі галасаваньня ад колькасьці тых, хто ўзяў удзел у галасаваньні, атрымліваецца, што зь іх «за» прагаласавала 82,85%, «супраць» — 12,8%, несапраўдных бюлетэняў — 4,35%.

01:03 28.2.2022

Ужо 500 затрыманых у Беларусі

Паводле дадзеных ТГ-канала Списики Окрестина, па стане на 00:13 28 лютага вядомыя прозьвішчы 500 затрыманых падчас акцыяў пратэсту ў Беларусі.

22:42 27.2.2022

У Менску прайшлі акцыі пратэсту супраць уварваньня Расеі ва Ўкраіну, затрымалі 300 чалавек

Лякальныя акцыі пратэсту супраць расійскага ўварваньня ва Украіну прайшлі 27 лютага ў розных раёнах Менска. Акцыі супалі з асноўным днём галасаваньня на рэфэрэндуме аб зьмяненьні Канстытуцыі, які закліканы яшчэ больш умацаваць уладу Аляксандра Лукашэнкі. Згодна са сьпісамі праваабаронцаў «Вясны» затрымалі 300 чалавек.

21:58 27.2.2022

«Не — вайне!», «Слава Ўкраіне!» Як беларусы пратэставалі ў дзень рэфэрэндуму. ФОТА

Лякальныя акцыі пратэсту супраць расейскага ўварваньня ва Ўкраіну прайшлі 27 лютага ў Менску і розных гарадах Беларусі. Акцыі супалі з асноўным днём галасаваньня на рэфэрэндуме аб зьмяненьні Канстытуцыі, які мае на мэце яшчэ больш умацаваць уладу Аляксандра Лукашэнкі.




Напярэдадні дэмакратычны лідэр Сьвятлана Ціханоўская заклікала суграмадзян а 14-й гадзіне прыйсьці на выбарчыя ўчасткі і «актыўна выказаць пратэст супраць вайны».

21:26 27.2.2022

Ціханоўская заклікала працягнуць акцыі пратэсту 28 лютага

Сьвятлана Ціханоўская заклікала працягнуць акцыі пратэсту супраць вайны заўтра, 28 лютага, на прывакзальных плошчах гарадоў а 18-й гадзіне. Пра гэта яна заявіла на прэсавай канфэрэнцыі.

20:25 27.2.2022

У Гомлі затрымалі юрыстку, кандыдата навук Ірыну Кучвальскую

Яна прыйшла да выбарчага ўчастку ў школе нумар 66 з антываенным плякатам.

20:12 27.2.2022

«Жанчыны адбівалі затрыманых», — менчукі расказваюць, як схадзілі прагаласаваць на рэфэрэндуме

У Беларусі 27 лютага — асноўны дзень галасаваньня на рэфэрэндуме аб зьменах у Канстытуцыі. Многія жыхары краіны адгукнуліся на заклік лідэраў апазыцыі прыходзіць на ўчасткі а 14-й гадзіне. Пра свой досьвед удзелу ў рэфэрэндуме Свабодзе расказалі трое менчукоў.

20:05 27.2.2022

Колькасьць затрыманых у Беларусі падчас рэфэрэндуму і на акцыях пратэсту вырасла да 182 чалавек

Людзей затрымлівалі на ўчастках для галасаваньня, а таксама ў цэнтры Менску падчас антываенных акцыяў, на якія выйшлі людзі каля Генэральнага штабу і на Нямізе. «Вясна» складае сьпіс затрыманых.

19:33 27.2.2022

У цэнтры Менску беларусы скандавалі «Пуцін — х*йло!»

У Менску працягваюцца антываенныя пратэсты. Беларусы гукаюць «Не — вайне!», «Слава Ўкраіне» і нават «Пуцін — х*йло!»

19:22 27.2.2022

На Нямізе ў Менску гудуць машыны, пратэстоўцы гукаюць „Не — вайне!“

У Беларусі працягваюцца антываенные пратэсты. Затрымалі ўжо больш за 110 чалавек.

19:05 27.2.2022

У пратэстах супраць вайны ва Ўкраіне ў дзень галасаваньня на рэфэрэндуме прынялі ўдзел каля 70 тысяч беларусаў па ўсім сьвеце

Пра гэта Свабодзе расказала Сьвятлана Ціханоўская.

18:54 27.2.2022

У Беларусі на рэфэрэндуме і акцыях пратэсту затрымалі ўжо 100 чалавек

Праваабаронцы складаюць сьпіс затрыманых у Беларусі падчас рэфэрэндуму і антываенных акцыях пратэсту. У сьпісе ўжо больш за 100 чалавек.

18:31 27.2.2022

У Менску надалей затрымліваюць удзельнікаў антываеннай акцыі

Зьявілася відэа затрыманьняў у Менску каля Опэрнага тэатру. Людзі гукаюць «Не — вайне!» Некаторыя трымаюць украінскія сьцягі.

18:14 27.2.2022

Колькасьць затрыманых вырасла да 88 чалавек

Як паведамілі праваабаронцы, на акцыях супраць вайны ва Ўкраіне і ўдзелу ў ёй беларусаў затрыманыя ўжо 88 чалавек, вядомыя іх імёны. Колькасьць удакладняецца, а затрыманьні працягваюцца. Яны прайшлі прынамсі ў 12 гарадах.

18:06 27.2.2022

Хакеры «паклалі» сайт ЦВК

Перастаў адкрывацца сайт Цэнтравыбаркаму Беларусі. На 17:50 на сайт ЦВК і шэраг іншых сайтаў дзяржаўных структураў РБ няма доступу. Каля гадзіны ночы на сайце ЦВК мусілі публікаваць папярэднія вынікі рэфэрэндуму. Адказнасьць за блякаваньне сайту ўзялі на сябе ўкраінскія хакеры.

18:02 27.2.2022

Галасаваньне ў Сьветлагорску. ВІДЭА

Вось так выглядае паход чальцоў камісіі па дамах для збору галасоў на поўдні краіны.

17:58 27.2.2022

Пачаліся затрыманьні каля Генэральнага штабу

Каля будынку Генэральнага штабу ў Менску сілавікі пачалі затрымліваць удзельнікаў акцыі пратэсту супраць вайны. Агулам за дзень у Беларусі ўжо мінімум 66 затрыманьняў.

17:40 27.2.2022

«Слава Ўкраіне! Героям слава!» каля Генэральнага штабу ў Менску. ВІДЭА

Антываенны пратэст у Менску працягваецца. Людзі сабраліся каля будынку Генэральнага штабу, як заклікала Сьвятлана Ціханоўская, і пратэстуюць супраць расейскага ўварваньня ва Ўкраіну і ўдзелу ў ім Беларусі.

17:23 27.2.2022

Сілавікі перакрываюць праезд да Генэральнага штабу

У Менску перакрылі пад’езды да Генэральнага штабу на вуліцы Камуністычнай, 1. Улады спрабуюць перашкодзіць пратэстам супраць вайны ва Ўкраіне і ўдзелу ў ёй беларускіх вайскоўцаў.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG