Лінкі ўнівэрсальнага доступу

Пікет у падтрымку Ўкраіны падчас галасаваньня ў Заслаўі (Менская вобласьць) 27 лютага
Пікет у падтрымку Ўкраіны падчас галасаваньня ў Заслаўі (Менская вобласьць) 27 лютага

Рэфэрэндум-2022: беларусы выйшлі з пратэстам — 500 затрыманых. Хроніка дня

абноўлена

27 лютага ў Беларусі праходзіць рэфэрэндум аб Канстытуцыі, прапанаванай Лукашэнкам. Пры гэтым праваабаронцы заяўляюць пра шматлікія парушэньні ў працэсе галасаваньня. Улады не адкрылі ўчасткаў за мяжой, пазбавіўшы права галасаваць сотні тысяч грамадзян. У самой краіне антываенны пратэст.

07:54 27.2.2022

У Беларусі праходзіць рэфэрэндум аб унясеньні зьменаў і дапаўненьняў у Канстытуцыю

У бюлетэні для галасаваньня толькі адно пытаньне: «Ці прымаеце вы змяненьні і дапаўненьні Канстытуцыі Рэспублікі Беларусь?». Варыянтаў адказу два: за і супраць.

У сьпісы для галасаваньня ўключаны 6 818 948 грамадзян Беларусі – на 26 тысяч менш, чым на выбарах 2020 году.

Сфармавана 5 510 участковых камісій. Ніводзін прадстаўнік апазыцыі ў іх склад не прайшоў, а сьпісы сяброў камісій засакрэцілі. Таксама на рэфэрэндуме ня будзе наглядальнікаў ад АБСЭ.

Рашэньне, прынятае на рэфэрэндуме, будзе мець абавязковую юрыдычную сілу і пачне дзейнічаць праз дзесяць дзён пасьля афіцыйнага апублікаваньня.

07:56 27.2.2022

ЦВК: датэрмінова на рэфэрэндуме прагаласавалі амаль 43% грамадзян. Гэта рэкорд

Паводле афіцыйных зьвестак, за тры дні датэрміновага галасаваньня на канстытуцыйным рэфэрэндуме прагаласавалі 42,93% грамадзян, уключаных у спісы для галасаваньня.

Пра гэта 26 лютага паведаміла Цэнтральная выбарчая камісія.

Апазыцыя лічыць датэрміновае галасаваньне асноўным мэханімам масавых фальсыфікацый электаральных кампаній.

08:56 27.2.2022

Дэпутат Савіных заявіў, што замежныя назіральнікі Беларусі больш не патрэбны

«Мы адыходзім ад тых падыходаў, калі вонкавыя назіральнікі павінны былі даць нейкую легітымацыю нашаму выбарчаму працэсу альбо любому працэсу плебісцыту», — ​цытуе дэпутата Андрэя Савіных тэлеграм-канал Палаты прадстаўнікоў:

«Мы лічым, што мы самі павінны ўдасканальваць уласнае заканадаўства і рабіць усё такім чынам, каб вынікі народнага волевыяўленьня нельга было паставіць пад сумнеў.
Нам не патрэбна станоўчая ацэнка з-за мяжы, нам больш ня трэба вонкавага ціску. Думаю, што гэтая практыка спыняе сваё існаваньне».

Назіральнікаў ад АБСЭ на рэфэрэндуме няма.

09:22 27.2.2022

Раніцай у Бабруйску затрымалі Галіну Сьмірнову

Лідэрку бабруйскай суполкі Аб'яднанай грамадзянскай партыі павезьлі ў РАУС, паведамляе «Вясна».

Галіна збіралася на працу, калі да яе прыйшлі супрацоўнікі міліцыі. Пасьля гэтага на сувязь яна больш не выходзіла.

09:29 27.2.2022

Нацыянальны сьцяг зьявіўся ў менскай Асмалоўцы

Раніцай 27 лютага на адным з дамоў у цэнтры Менску зьявіўся бел-чырвона-белы сьцяг.

09:35 27.2.2022

У Ваўкавыску затрымалі мясцовых жыхароў, якія выйшлі на акцыю пратэсту

Праваабаронцам «Вясны» стала вядома пра затрыманьне ўчора ў Ваўкавыску Людмілы Шрубок, Ліліі Юруць ды Уладзімера Краўцэвіча, якія выйшлі на акцыю пратэсту са сьцягамі. Іх затрымаў горадзенскі ГУБАЗіК.

Дома ў затрыманых прайшлі ператрусы.

09:51 27.2.2022

Ціханоўская заклікала пратэставаць супраць вайны каля выбарчых участкаў

У відэазвароце Сьтвятлана Ціханоўская заклікала 27 лютага а 14-й гадзіне прыходзіць да выбарчых участкаў у Беларусі і актыўна выказваць пратэст супраць нападу Расеі на Ўкраіну.

10:02 27.2.2022

Пацыентам менскіх шпіталяў прыносяць бюлетэні і глядзяць, як яны галасуюць

Праваабаронцам «Вясны» стала вядома пра факты парушэньня тайны галасаваньня ў 2-й лякарні Менску. Паведамляецца, што пасьля раздачы бюлетэняў пацыентам супрацоўнікі выбарчай камісіі стаяць над людзьмі і глядзяць, хто як галасуе.

10:14 27.2.2022

У Віцебску чальцы выбарчых камісій ходзяць па кватэрах і прапаноўваюць прагаласаваць на месцы

Праваабаронцам «Вясны» стала вядома, што ў Віцебску па пад’ездах дамоў ходзяць людзі, якія прадстаўляюцца сябрамі выбарчай камісіі і прапануюць прагаласаваць на месцы — каля дзьвярэй кватэры.

10:31 27.2.2022

У Дрыбіне затрымалі актывіста Юркова

Учора ў Дрыбіне прэвэнтыўна затрымалі грамадзкага актывіста Андрэя Юркова. Да суду ў панядзелак Андрэя трымацьмуць за кратамі. Перад гэтым, 17 лютага, у яго забралі кампутар і мабільны тэлефон.

10:37 27.2.2022

Зяленскі зьвярнуўся да беларусаў. ВІДЭА

«На вайне, якая ідзе зараз, вы з намі не на адным баку. На жаль». І пажадаў беларусам зрабіць «правільны выбар» на рэфэрэндуме аб зьмяненьні Канстытуцыі:

«Шчыра жадаю Беларусі зноў стаць такой жа добрай і бясьпечнай, якой яе яшчэ нядаўна ўсе бачылі. Зрабіце правільны выбар – гэта галоўны выбар вашага жыцьця».

11:01 27.2.2022

Вайсковая тэхніка ў Менску

У Менску зьявілася вайсковая тэхніка, якую звычайна выкарыстоўвалі для разгону акцый пратэсту.

11:01 27.2.2022

Праваабаронцы: На рэфэрэндум запрашаюць людзей, якія памерлі год таму

Праваабаронцам стала вядома пра факты запрашэньня на рэфэрэндум людзей, якія ўжо памерлі – так, беларусцы на хатні нумар тэлефанавалі нібыта з выбарчай камісіі і запрашалі на галасаваньне яе 85-гадовую маці, якая памерла год таму, паведамляе праваабарончы цэнтар «Вясна».

Высьветлілася, што жанчына ёсьць у выбарчых сьпісах. Таксама вядома пра выпадак, калі чалавек, які ўжо больш за 10 гадоў недзеяздольны, чамусьці знаходзіцца ў выбарчых сьпісах.

11:07 27.2.2022

ЦВК назваў яўку на 10:00: 46%

Паводле ЦВК, амаль палова выбарнікаў ужо нібыта прагаласавалі. Масавае датэрміновае галасаваньне, на думку апазыцыі, зьяўляецца асноўным мэханізмам фальсыфікацый.

11:12 27.2.2022

Сілавікі здымаюць сьцягі і плякаты ў падтрымку Ўкраіны і супраць Лукашэнкі

Пра гэта паведаміў блогер Антон Матолька. Такія выпадкі зафіксаваныя ў Менску на Залатой Горцы, вуліцах, Гікалы, Берута, на Асмалоўцы.

11:24 27.2.2022

Лукашэнка прызнаў, што з тэрыторыі Беларусі запусьцілі ракеты па Ўкраіне

«Сапраўды, з тэрыторыі чарнобыльскіх прыкладна раёнаў, дзе былі на вучэньнях расейскія войскі, былі запушчаныя дзьве ці тры ракеты», — сказаў Лукашэнка, выступаючы на выбарчым участку пасьля галасаваньня.

Таксама Лукашэнка заявіў, што ва Ўкраіне няма ні беларускіх салдат, ні ўзбраеньня, ні боепрыпасаў.

11:43 27.2.2022

Раскажыце нам, што адбываецца ў вашым горадзе падчас рэфэрэндуму

Дасылайце свае фота і відэа ў бот Свабоды @SvabodaBelarus_bot.

13:00 27.2.2022

Паход камісій па дварах

У Гомлі выбарчыя камісіі ходзяць па дварах і ўгаворваюць галасаваць тых, хто сядзіць на лаўках каля пад’ездаў. Гэта не прадугледжана заканадаўствам. Праваабаронцы заявілі пра шматлікія парушэньні на датэрміновым галасаваньні і ў самім працэсе арганізацыі рэфэрэндуму. Нагадаем, што сёньня ў 2-й лякарні ў Менску сябры камісіі падглядалі, за што галасуюць людзі, да якіх яны прыйшлі ў палату.

13:02 27.2.2022

ЦВК: Рэфэрэндум адбыўся

Цэнтравыбаркам даў справаздачу, што яўка на рэфэрэндуме нібыта склала 53%. Гэта значыць, што, згодна з афіцыйнымі лічбамі, рэфэрэндум адбыўся.

13:17 27.2.2022

Акцыі ў Менску ў падтрымку Ўкраіны

Блогер Антон Матолька паведамляе, што ў Беларусі за ноч і раніцу нанесьлі шэраг надпісаў супраць вайны, у падтрымку незалежнасьці Беларусі. Таксама беларусы разьвешвалі ў сваіх гарадах нацыянальныя сьцягі Беларусі і Ўкраіны. Сёньня на 14-ю гадзіну прызначаны збор людзей каля сваіх выбарчых участкаў для дэманстрацыі антываенных настрояў і пратэсту супраць дзеяньняў Пуціна і Лукашэнкі.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG