«Настоящее время» вядзе прамую трансьляцыю прэс-канфэрэнцыі Пуціна і Шольца.
Шольц прыляцеў у Маскву сёньня пасьля візыту ў Кіеў, які адбыўся днём раней. Гэта першая сустрэча Шольца з Пуціным пасьля таго, як у канцы 2021 году ён узначаліў новы ўрад Нямеччыны.
На пачатку сустрэчы з Пуціным нямецкі канцлер заявіў, што рады магчымасьці асабістай сустрэчы для ўрэгуляваньня канфлікту. Ён адзначыў важнасьць урэгуляваньня адносінаў паміж дзяржавамі шляхам дыялёгу.
Між тым у Крамлі паведамілі, што асноўнымі на перамовах стануць «актуальныя тэмы двухбаковага і міжнароднага парадку дня, у тым ліку пытаньні, зьвязаныя з атрыманьнем доўгатэрміновых, юрыдычна зафіксаваных гарантыяў бясьпекі РФ і ўрэгуляваньнем унутрыўкраінскага канфлікту». Паводле словаў прэсавага сакратара Пуціна Дзьмітрыя Пяскова, адной з тэмаў сустрэчы таксама стане запуск газаправоду «Паўночны паток — 2».
Пасьля прылёту ў Маскву Шольц адмовіўся ад прапановы расейскага боку зрабіць яму тэст на каранавірус перад сустрэчай з Пуціным і палічыў за лепшае зрабіць ПЦР-тэст, неабходны для допуску ў Крэмль, у нямецкага ўрача ў амбасадзе Нямеччыны ў Маскве. У асяродзьдзі канцлера паведамілі, што нямецкі бок запрасіў прадстаўнікоў органаў аховы здароўя РФ прысутнічаць на тэставаньні. Увесь камплект, неабходны для правядзеньня тэсту, быў прывезены зь Нямеччыны.
Пяскоў заявіў, што адмова Шольца ад ПЦР-тэставаньня расейскімі мэдыкамі ніяк «не паўплывае ні на характар сустрэчы, ні на яе зьмястоўнасьць, ні на працягласьць». Разам з тым перамовы будуць праходзіць «на большай, чым звычайна, адлегласьці». «Ва ўсіх бакоў ёсьць свае пратаколы, ёсьць свае перавагі, і мы з абсалютнай павагай і разуменьнем ставімся да тых пратаколаў, якія ёсьць у нашых партнэраў зь Нямеччыны», — адзначыў прадстаўнік прэзыдэнта РФ.
Перад сустрэчай з Пуціным Шольц усклаў вянок да Магілы Невядомага Салдата ў Аляксандраўскім садзе Крамля. Пасьля перамоваў і рабочага сьняданку заплянаваная сумесная прэсавая канфэрэнцыя, а ўвечары Шольц вылеціць у Бэрлін.
На мінулым тыдні ў Маскву для перамоваў з Пуціным прылятаў прэзыдэнт Францыі Эманюэль Макрон. Аднак ні на гэтай сустрэчы, ні на іншых аналягічных перамовах заходніх лідэраў і прадстаўнікоў міжнародных арганізацыяў з расейскім бокам прагрэсу ва ўрэгуляваньні канфлікту дасягнута не было. Захад заклікае Маскву адвесьці войскі ад украінскай мяжы і пагражае беспрэцэдэнтнымі санкцыямі. Расея ж абвінавачвае краіны Захаду ва ўзбройваньні Ўкраіны і правядзеньні манэўраў паблізу ад межаў РФ.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
