Пра гэта паведаміў кіраўнік праваабарончай групы «Агора» Павел Чыкаў.
Справа тычыцца турэмнага тэрміну Пашыньяна за ўдзел у пратэстах пасьля прэзыдэнцкіх выбараў 2008 году. Нікол Пашыньян у той час быў галоўным рэдактарам апазыцыйнай газэты Haykakan Zhamanak (Armenian Times) і актыўным прыхільнікам кандыдата ў прэзыдэнты Лявона Тэр-Петрасьяна.
У ноч з 19 на 20 лютага 2008 году пасьля абвяшчэньня вынікаў галасаваньня на прэзыдэнцкіх выбарах Пашыньян заклікаў прыхільнікаў Тэр-Петрасьяна, які прайграў выбары, выйсьці на пратэсты ў яго падтрымку. На мітынг сабраліся дзясяткі тысяч чалавек, яны разьбілі намётавае мястэчка. Паліцыя разагнала пратэстоўцаў з ужываньнем сілы.
Нікола Пашыньяна прыцягнулі да крымінальнай адказнасьці за арганізацыю масавых беспарадкаў і захоп улады. Пазьней другое абвінавачаньне зь яго зьнялі. У студзені 2010 году яго асудзілі на 7 гадоў за арганізацыю масавых беспарадкаў. Пазьней суд удвая скараціў тэрмін, а ў траўні 2011 году Пашыньян выйшаў на волю па амністыі ў гонар 20-годзьдзя незалежнасьці Армэніі.
У сваёй апэляцыі ў ЭСПЧ у 2010-2011 гадах Пашыньян настойваў на тым, што крымінальны перасьлед у сувязі з падзеямі 2008 году быў абумоўлены яго палітычнымі выступамі і апазыцыйнай дзейнасьцю.
ЭСПЧ вырашыў, што былі парушаныя артыкулы 11 (свабода сходаў і абʼяднаньняў) і 5 (права на свабоду і асабістую недатыкальнасьць) Эўрапейскай канвэнцыі правоў чалавека. Прэмʼер Армэніі не выстаўляў патрабаваньняў аб фінансавай кампэнсацыі, а значыць, не атрымае яе.