Прэс-служба Мінабароны Беларусі апублікавала відэа з камэнтаром, у якім гаворыцца, што войскі будуць прыбываць на працягу ўсяго першага этапу раптоўнай праверкі сіл рэагаваньня так званай «саюзнай дзяржавы».
Яна павінна завяршыцца манэўрамі ля межаў Украіны пад назвай «Саюзная рашучасьць – 2022». Аляксандар Лукашэнка ўчора заявіў, што падчас манэўраў будзе адпрацоўвацца супрацьстаяньне Польшчы, Украіне і краінам Балтыі.
На відэазапісе можна ўбачыць чыгуначныя плятформы з вайсковымі грузавікамі, а таксама разгрузку баявой тэхнікі.
Рааней міністар абароны Віктар Хрэнін адзначыў, што ў 2022 годзе Беларусь і Расея ня будуць рабіць маштабных манэўраў кшталту «Захаду» або «Шчыта Саюзу», але заплянаваны комплекс мерапрыемстваў для прыкрыцьця паўднёвых межаў краіны:
«Мы плянуем правядзеньне вучэньня сумесна з нашымі калегамі, асноўным стратэгічным саюзнікам — Расейскай Фэдэрацыяй», — сказаў міністар абароны.
«Мы бачым, як вакол нашых дзяржаўных межаў ствараюцца групоўкі войскаў як на заходнім, так і на паўднёвым кірунках. Актыўна мілітарызуюцца краіны-суседкі, і гэта ня можа нас не турбаваць, таму мы вымушаныя плянаваць захады ў адказ», — сказаў кіраўнік ведамства, паабяцаўшы «рашучы адказ на любыя неадэкватныя дзеяньні».
Лукашэнка заявіў, што яго насьцярожвае становішча і на «паўднёвых рубяжах», ён упэўнены, што з боку Ўкраіны ідзе нарошчваньне вайсковага кантынгенту.
У Службе бясьпекі Ўкраіны назвалі заяву Аляксандра Лукашэнкі пра нібыта сьцягваньне ўкраінскіх войскаў на мяжу зь Беларусьсю «часткай інфармацыйнай вайны».
«Маніпуляцыйныя заявы пракрамлёўскіх палітыкаў і прадстаўнікоў дзяржаў-сатэлітаў Расейскай Фэдэрацыі пра нібыта нарошчваньне Ўкраінай паблізу ўласных межаў „нацыяналістаў-радыкалаў“, якія нібыта „похлеще, чем натовские военнослужащие“, не адпавядаюць рэчаіснасьці і ёсьць палітычнай маніпуляцыяй і часткай інфармацыйнай вайны супраць Украіны», — сказаў Свабодзе начальнік упраўленьня па ўзаемадзеяньні з сродкамі масавай інфармацыі і грамадзкасьцю СБУ Арцём Дзехцярэнка.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Ад пачатку паўнамаштабнага ўварваньня ва Ўкраіне загінулі як найменей 34 беларусы, якія змагаюцца за яе незалежнасьць.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- Паводле звестак ААН, у выніку паўнамаштабнай вайны каля 8 мільёнаў жыхароў Украіны сталі ўцекачамі.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- За шэсьць месяцаў вайны Расея змагла акупаваць каля 20% украінскай тэрыторыі. У сакавіку 2022 году плошча акупаваных зямель даходзіла да 30%. Аднак у канцы месяца расейскія войскі адступілі з поўначы Ўкраіны, а таксама з большай часткі Харкаўскай вобласьці. На канец жніўня цалкам акупаванымі былі Крым, Луганская і Херсонская вобласьці. А таксама 50% тэрыторыі Данецкай вобласьці, каля 70% Запароскай, прыкладна 30% Харкаўскай.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў