Заявы прагучалі на фоне паведамленьняў аб магчымым уварваньні расейскіх войскаў на тэрыторыю Ўкраіны.
Прэзыдэнт Нііністэ сказаў: «Права Фінляндыі свабодна выбіраць свой шлях уключае і магчымасьць далучэньня да NATO, калі мы самі зробім такі выбар».
Прэм’ер-міністар Марын заявіла, што кожная краіна мае права выбіраць сваю палітыку бясьпекі. «Мы засвоілі ўрокі гісторыі, і мы не саступім права на свабоду выбару», — сказала яна.
Міністар замежных спраў Расеі Сяргей Лаўроў на мінулым тыдні заявіў, што далучэньне Фінляндыі і Швэцыі да NATO будзе мець сур’ёзныя вайсковыя і палітычныя наступствы, якія запатрабуюць адэкватнага адказу расейскага боку.
- Адміністрацыя Байдэна і кіраўніцтва NATO неаднаразова заяўлялі, што альянс праводзіць палітыку адчыненых дзьвярэй і што ніякая краіна ня будзе мець права вэта на імкненьне іншай дзяржавы ўступіць у альянс.
- Выведкі краінаў NATO западозрылі Расею ў падрыхтоўцы поўнамаштабнага наступу ва Ўкраіне. Крэмль гэтыя пляны катэгарычна адмаўляе і, у сваю чаргу, настойвае на гарантыях бясьпекі ад NATO.
- Масква, па словах Пуціна, дамагаецца «цьвёрдых прававых гарантый, якія выключаюць прасоўваньне NATO на ўсход і разьмяшчэньне пагрозьлівых сыстэм узбраеньня ў непасрэднай блізкасьці ад расейскіх межаў».
