Лінкі ўнівэрсальнага доступу

Матэрыялы праваабаронцаў «Вясны» могуць прызнаць экстрэмісцкімі, прызначылі суд


Вясноўцы на канфэрэнцыі ў Вільні, верасень 2021

У Беларусі хочуць забараніць распаўсюд матэрыялаў пра палітычны перасьлед і парушэньні правоў чалавека.

На 29 сьнежня ў Чыгуначным судзе Гомля пройдзе судовае паседжаньне, якое можа прызнаць матэрыялы праваабарончага цэнтру «Вясна» «экстрэмісцкімі». На вынясеньне рашэньня адведзена ўсяго паўгадзіны, адзначае «Медиазона»​.

Судзьдзя — Ільля Сьвірыдаў. «Вясна» распавяла, што вядома пра яго:

  • Выносіў штрафы і «суткі» гомельскім актывістам з 2008 году;
  • Прызнаў хатнюю гаспадыню Марыю Тарасенку «дармаедкай»;
  • Адмовіў у праве навучацца на беларускай мове ў школе.

У гэты момант у беларускіх турмах знаходзяцца 7 прадстаўнікоў «Вясны», супраць іх чыніцца палітычны перасьлед. Ужо чвэрць стагодзьдзя ПЦ «Вясна» займаецца дакумэнтаваньнем парушэньняў правоў чалавека ў Беларусі. Улады неаднаразова перасьледавалі праваабаронцаў як «Вясны», так і іншых арганізацый за іх дзейнасьць, пазбаўлялі афіцыйнай рэгістрацыі ў Міністэрстве юстыцыі.

Падтрымаць зьняволеных «вясноўцаў» лістамі салідарнасьці можна на адрасы:

СІЗА-1, 220030, г. Менск, вул. Валадарскага, 2 (Алесь Бяляцкі, Валянцін Стэфановіч, Уладзімер Лабковіч, Марфа Рабкова, Андрэй Чапюк);
СІЗА-3, 246003, г. Гомель, вул. Кніжная, 1А (Леанід Судаленка, Тацяна Ласіца).

Што трэба ведаць пра экстрэмізм у Беларусі

14 траўня 2021 году быў падпісаны закон «Аб зьмене законаў у пытаньнях супрацьдзеяньня экстрэмізму», які набыў моц 14 чэрвеня. Раней праект у Палату прадстаўнікоў унёс урад, 2 красавіка яго прынялі ў першым чытаньні, а 16 красавіка — у другім. Нягледзячы на тое, што зьмены закранаюць правы, свабоды і абавязкі грамадзян і юрыдычных асобаў, публічныя абмеркаваньні не праходзілі.

У Беларусі прызнаныя экстрэмісцкімі звыш 300 тэлеграм-рэсурсаў.

Тэлеграм-канал можа прызнавацца як экстрэмісцкім матэрыялам, так і экстрэмісцкім фармаваньнем. Калі ў яго статус «экстрэмісцкага фармаваньня», ягоныя падпісчыкі таксама могуць стаць фігурантамі крымінальных спраў. У той жа час падпіска на каналы, якія прызнаныя «экстрэмісцкімі матэрыяламі», не караецца — пры ўмове, што падпісчык не аказвае падтрымкі ў папулярызацыі каналу: не рэпосьціць, не пералічвае грошай, не зьлівае туды інфармацыю.

«Матэрыялы» і «фармаваньні» сілавікі разьмяжоўваюць так: «экстрэмісцкія матэрыялы» — гэта тое, што робіць чалавек, а «экстрэмісцкія фармаваньні» — тыя, хто робіць.

Пры гэтым у МУС Беларусі адзначаюць, што стваральнікам, арганізатарам і ўдзельнікам экстрэмісцкіх фармаваньняў пагражае пазбаўленьне волі да 7 гадоў.

Першыя экстрэмісцкія фармаваньні ў Беларусі вызначылі ў сярэдзіне кастрычніка — інтэрнэт-рэсурсы dze. chat і «Рабочы рух». Цяпер іх ужо дзясяткі.

Прыцягнуць да адказнасьці за «экстрэмізм» цяпер могуць па цэлым шэрагу напрамкаў.

  • Экстрэмісцкія матэрыялы — рашэньне суду, якое прымаецца ў дачыненьні да інфармацыі.
  • Экстрэмісцкая група — устойлівая кіраваная група ў колькасьці дзьвюх ці больш асоб, якія папярэдне аб’ядналіся для ажыцьцяўленьня экстрэмісцкай дзейнасьці.
  • Экстрэмісцкая арганізацыя — арганізацыя, якая ажыцьцяўляе экстрэмісцкую дзейнасьць, альбо якая аказвае іншае садзейнічаньне экстрэмісцкай дзейнасьці, або якая прызнае магчымасьць яе ажыцьцяўленьня ў сваёй дзейнасьці, альбо якая фінансуе экстрэмісцкую дзейнасьць, у дачыненьні да якой прынята і ўступіла ў законную сілу рашэньне суду аб прызнаньні яе экстрэмісцкай.
  • Экстрэмісцкае фармаваньне — група грамадзян, якая ажыцьцяўляе экстрэмісцкую дзейнасьць, альбо якая аказвае іншае садзейнічаньне экстрэмісцкай дзейнасьці, або якая прызнае магчымасьць яе ажыцьцяўленьня ў сваёй дзейнасьці, або якая фінансуе экстрэмісцкую дзейнасьць, у дачыненьні да якой прынята рашэньне Міністэрства ўнутраных спраў або Камітэту дзяржаўнай бясьпекі аб прызнаньні яе экстрэмісцкай.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG