Лінкі ўнівэрсальнага доступу

«Беларусьнафта» праз санкцыі адмовілася ад паставак у Нямеччыну ў 2022 годзе


«Беларуснафта» трапіла ў пяты пакет санкцый Эўразьвязу.

«Беларусьнафта» адмовілася выконваць кантракт на пастаўку нафты ў Нямеччыну па нафтаправодзе «Дружба» ў 2022 годзе, паведамілі крыніцы Reuters.

Паводле інфармацыі агенцтва, у лістападзе «Беларусьнафта» прадала на тэндэры частку аб’ёму экспартных паставак — каля 40 тысяч тон у месяц — кампаніі Royal Dutch Shell. Беларуская кампанія павінна была распачаць пастаўкі ў пачатку 2022 году, але адмовілася ад пагадненьня ў пачатку сьнежня на фоне ўвядзеньня заходніх санкцый.

Беларуская кампанія плянуе перанакіраваць абʼёмы нафты на нафтаперапрацоўчыя заводы краіны, сьцьвярджае Reuters. Гэта можа прывесьці да скарачэньня паставак нафты ў Беларусь з Расеі.

Гадавы абʼём паставак Беларусі ў Нямеччыну складаў 1,6-1,8 млн тон. У 2020 годзе «Беларуснафта» паставіла на экспарт 1,2 млн тон на 343,2 млн даляраў.

2 снежня Эўразьвяз, Вялікая Брытанія, ЗША і Канада ўвялі чарговыя санкцыі супраць рэжыму ў Беларусі, пад якія трапіла і «Беларусьнафта».

Ад пачатку сьнежня адсутнічаюць экспартныя пастаўкі нафты зь Беларусі ў Нямеччыну.

Агенцтва «Інтэрфакс» са спасылкай на расейскую статыстыку паведамляе, што Беларусь з пачатку месяца не пастаўляе нафту ў Нямеччыну па трубаправодзе «Дружба».

Згодна з экспартным графікам, пастаўкі зь Беларусі у Нямеччыну праз «Дружбу» у сьнежні павінны скласці 150 тысяч тон. Аднак, згодна са статыстыкай, нафта за першы тыдзень не экспартавалася зусім.

Экспартам нафты зь Беларусі займаецца прадпрыемства «Беларусьнафта», якое трапіла ў пяты пакет санкцый Эўразьвязу.

Санкцыі Эўразьвязу супраць рэжыму Лукашэнкі

Эканамічныя сэктаральныя санкцыі

Эканамічныя сэктаральныя санкцыі былі ўведзеныя Эўразьвязам пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф'і Сапегі, а таксама з прычыны парушэньняў правоў чалавека і рэпрэсій.

У матывацыйнай частцы прынятага рашэньня прыгадваюцца, у прыватнасьці, эскаляцыя сур’ёзных парушэньняў правоў чалавека ў Беларусі і жорсткія рэпрэсіі супраць грамадзянскай супольнасьці, дэмакратычнай апазыцыі і журналістаў, а таксама асобаў, якія належаць да нацыянальных меншасьцяў.

24 чэрвеня 2021 году Эўразьвяз увёў наступныя абмежавальныя захады:

  • У экспарце і перадачы абсталяваньня, тэхналёгіяў або праграмнага забесьпячэньня, прызначанага для выкарыстаньня ў інтарэсах беларускіх уладаў у маніторынгу або перахопе Інтэрнэту і тэлефоннай сувязі на мабільных або стацыянарных прыладах.
  • У экспарце ў Беларусь тавараў падвойнага прызначэньня для вайсковага выкарыстаньня.
  • У экспарце ў Беларусь тавараў, якія выкарыстоўваюцца для тытунёвых вырабаў.
  • У імпарце ў ЭЗ нафтапрадуктаў з Беларусі.
  • У імпарце ў ЭЗ калійных угнаеньняў з Беларусі,
  • У доступе на фінансавыя рынкі ЭЗ ўраду Беларусі, а таксама беларускім дзяржаўным фінансавым інстытутам і субʼектам.
  • Эўрапейскаму інвэстыцыйнаму банку забаронена фінансаваць праекты ў дзяржаўным сэктары Беларусі.

Санкцыі супраць асобаў і прадпрыемстваў

Раней, на пасяджэньні ў Люксэмбургу 21 чэрвеня 2021 году, міністры замежных спраў Эўразьвязу зацьвердзілі чацьвёрты пасьля прэзыдэнцкіх выбараў 2020 году ў Беларусі пакет санкцый супраць беларускага рэжыму.

Санкцыйны сьпіс з 78 чалавек і 8 арганізацый, якім замарожваюцца актывы і забараняецца выдача візаў у Эўразьвяз, быў апублікаваны ў афіцыйным часопісе Эўразьвязу, такім чынам ён набывае моц.

Яшчэ раней, у кастрычніку, лістападзе і сьнежні 2020 году Эўразьвяз увёў тры пакеты санкцый супраць уладаў Беларусі. Абмежавальныя захады тычацца афіцыйных асобаў, а таксама некаторых прадпрыемстваў. Агулам у санкцыйным сьпісе тады апынуліся 84 асобы, якім забаронены ўезд у краіны ЭЗ. У сьпіс уваходзіць Аляксандар Лукашэнка, ягоны сын Віктар Лукашэнка, кіраўніца ЦВК Лідзія Ярмошына, старшыня КДБ Іван Тэртэль, старшыня Сьледчага камітэту Іван Наскевіч, генэральны пракурор Андрэй Швед і іншыя сілавікі, а таксама судзьдзі і чальцы выбарчых камісіяў.

Сярод іншага, ЭЗ увёў санкцыі супраць юрыдычных асобаў: ЗАТ «Белтэхэкспарт», «Дана Холдынгз/Дана Астра», Кіраўніцтва справаў прэзыдэнта Беларусі, ТАА «Сінэзіс», ААТ «АГАТ — электрамэханічны завод», ААТ «140-ы рамонтны завод» і ААТ «Менскі завод колавых цягачоў».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG