Лінкі ўнівэрсальнага доступу

Хроніка перасьледу 8 сьнежня: затрымалі распрацоўніка праекту WiFi Map і былога палітвязьня Хведарука


У камэры ЦІП на вуліцы Акрэсьціна ў Менску. Архіўнае фота

Паводле тэлеграм-каналу «Списки задержанных», 8 сьнежня ў Беларусі затрымалі прынамсі 6 чалавек.

Затрымалі праграміста Плашчынскага

У сьпісах затрыманых зьявілася прозьвішча праграміста Дзьмітрыя Плашчынскага. Ён грамадзянін Ізраілю, паведамляе Dev.by.

Дзьмітры — сузаснавальнік і распрацоўшчык WiFi Map, займаецца гэтым праектам з 2012 году.

У «пакаяльным» роліку, які апублікавалі праўладныя каналы, ён кажа, што раней быў падпісаны на каналы, прызнаныя экстрэмісцкімі, але адпісаўся ад іх; «удзельнічаў у размове з Антонам Матолькам» і нібыта адсылаў фота некаторым тэлеграм-каналам.

Таксама Дзьмітры прызнаецца, што ў яго ва ўласнасьці ёсьць паляўнічая зброя, ён мае дазвол на яе. На момант ператрусу яна знаходзілася ня ў сэйфе.

Блізкія Дзьмітрыя ня маюць ніякай іншай інфармацыі пра яго затрыманьне. Вядома толькі, што сёньня будзе суд.

WiFi Map — краўдсорсінгавая плятформа, якая зьмяшчае больш за 150 млн пароляў для WiFi-пунктаў доступу па ўсім сьвеце. Цяпер у аплікацыі 1 млрд злучэньняў. Яе разьвіцьцём і прасоўваньнем займаецца амэрыканская кампанія WiFi Map LLC. Цэнтар распрацоўкі ў Менску адкрыўся ў 2019 годзе.

Затрымалі былога палітвязьня Хведарука

8 сьнежня ў Менску затрымалі Зьмітра Хведарука.

Пра гэта ў Фэйсбуку паведаміў сябра яго сям’і Сяргей Мельянец са спасылкай на допіс жонкі Зьмітра — Ганны:

«Па Зьмітра Хведарука прыйшлі сёньня. Хто прыйшоў — вы самі ведаеце. Хрысьціянін, багаслоў, пэдагог, пісьменьнік. Неабыякавы чалавек. Мой сябар. Яго жонка Аня піша: „Да нас прыйшлі, Зьмітра забралі, пры мне ня білі, але вельмі за яго перажываю“».

Зьміцер Хведарук — былы кіраўнік менскай гарадзкой арганізацыі «Малады Фронт». Раней праваабарончая супольнасьць прызнавала яго палітычным вязьнем. Ад палітычнай дзейнасьці даўно адышоў.

2 гады і 3 месяцы калёніі за абразу міліцыянта

У судзе Докшыцкага раёну разгледзелі крымінальную справу ў дачыненьні да Аляксандра Сяліцкага, якога абвінавацілі ў абразе прадстаўніка ўлады ў сувязі з выкананьнем ім службовых паўнамоцтваў (арт. 369 КК), паведамляе «Вясна».

Сяліцкі ў «Аднаклясьніках» пакінуў абразьлівы камэнтар пад публікацыяй Вольгі Карач пра міліцыянта Бабруйскага РАУС Андрэя Комара: «Участковыя худымі бываюць? Гатовыя за лішні мех камбікорму несьці ўсякую лухту ў судзе, але нічога не бывае вечнага, і мы гэтых ж*палізных бл*дзяў адгонім палкай ад карыта».

Затрыманьне за «фінансаваньне пратэстаў»

Міліцыя затрымала 23-гадовага жыхара Драгічына па справе аб «фінансаваньні пратэстаў». Ведамства сьцьвярджае, што ён аплачваў штрафы, паслугі адвакатаў, дзяржпошліны і рахункі арыштаваных за знаходжаньне ў ІЧУ.

МУС спасылаецца на леташні пост у сацыяльных сетках з заклікам да «збору сродкаў для актывістаў пратэставай дзейнасьці». Дзе канкрэтна быў разьмешчаны пост, не ўдакладняецца.

«Пост утрымліваў рэквізыты банкаўскай карты 23-гадовага непрацуючага жыхара Берасьцейскай вобласьці. На гэты рахунак ад розных фізычных асоб, а таксама з банкаўскіх рахункаў замежных крэдытна-фінансавых арганізацый сталі паступаць грашовыя пераводы», — піша ведамства.

Па вэрсіі сілавікоў, жыхар Драгічына з жніўня 2020 году па студзень 2021 году «неаднаразова рабіў плацяжы» за пратэстоўцаў, прыцягнутых да адміністрацыйнай адказнасьці за ўдзел у акцыях.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG