Лінкі ўнівэрсальнага доступу

«Як тут крыва не ўсьміхнуцца!». Лявон Вольскі пра добрае ў 2021-м


Лявон Вольскі. Аўтар фота: Андрэй Давыдчык

Свабода зьвярнулася да вядомых у беларускай публічнай прасторы асобаў з просьбай адказаць на пытаньне: Што Вас парадавала/прымусіла ўсьміхнуцца ў 2021-м? Такім чынам мы паспрабавалі адшукаць крупінкі радаснага, добрага і сьветлага ў гэтым змрочным годзе беларускай гісторыі.

Сёньня на наша пытаньне адказвае Лявон Вольскі.

— Калі задумацца, дык нагодаў для радасьці было ня надта й шмат. Але былі. Парадавалі вандроўкі, хаця для іх цяпер ня вельмі зручны час. Тым ня меней, у параўнаньні зь мінулым годам мы шмат езьдзілі па Эўропе, і гэта было весела і цікава. Часам гэта спалучалася з канцэртамі, часам — не (напрыклад, у сярэдзіне лета мы на тыдзень выбраліся на мора).

Калі пра «прымусіла ўсьміхнуцца» — дык гэта шмат розных рэчаў, часам, ня вельмі вясёлых, таму ўсьміхаўся саркастычнай крываватай усьмешкай. Гэта новыя вельмі крэатыўныя ініцыятывы ўладаў, часьцяком інсьпіраваныя «сілавікамі». У розных галінах — працягу змаганьня са «змагарамі», «патрыятычнага выхаваньня» моладзі і падлеткаў, фільтрацыі тэатральнага і кінапрадукту, прыняцьця новых цікавых, можна сказаць, эксклюзіўных, законаў. Як тут крыва не ўсьміхнуцца! Здаецца, гэтыя людзі згубіліся ў прасторы й часе і зусім не разумеюць, у якім стагодзьдзі і ў якой краіне знаходзяцца.

Лявон Вольскі — музыка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG