Лінкі ўнівэрсальнага доступу

Сайт Оrsha.eu заблякавалі па рашэньні пракуратуры


Ілюстрацыйнае фота

Пра блякіроўку сайта Оrsha. eu паведамілі ў Рэспубліканскім унітарным прадпрыемстве па наглядзе за электрасувязьзю.

Рэдакцыя партала пакуль ня ведае дакладнай прычыны блякіроўкі, паведамляе Беларуская асацыяцыя журналістаў.

Раніцай 26 лістапада рэдакцыя паведаміла, што сайт парталe трэці дзень запар працуе са збоямі.

«Пакуль яшчэ рана казаць дакладна, што адбываецца, бо аніякіх папярэджаньняў з боку дзяржавы, што сайт нешта мог парушыць, не было. Але тэхнічна тое, што сайт не адчыняецца зусім, або адчыняецца не зь першага разу, найбольш падобна да таго, што сайт блякуюць нейкія дзяржаўныя структуры», — адзначылі ў рэдакцыі Оrsha.eu.

Рэдакцыя адзначыла, што ня спыніць працу, нягледзячы на часовыя нязручнасьці.

«Усё ж такі ў нас ня толькі самы папулярны сайт пра Воршу, але і старонкі ў сацыяльных сетках. Таму асноўны ўпор мы зробім зараз менавіта на іх. Вас таксама запрашаем далучацца да нашых старонак і выбраць тую сацыяльную сетку якая вам найбольш зручная»,— зьвярнулася рэдакцыя выданьня да сваіх чытачоў.

Галоўнага рэдактара Оrsha.eu Ігара Казьмерчака затрымлівалі сёлета ўлетку ў межах крымінальнай справы аб «псаваньні маёмасьці», якую потым закрылі. Казьмярчак — вядомы аршанскі палітычны і грамадзкі актывіст, праваабаронца, кіраўнік моладзевага аб'яднаньня «Зьвяз», якое ліквідавалі сёлета ў верасьні.

Да таго ж, Казьмярчак меў «Цудоўную краму», якая гандлявала беларускай нацыянальнай сымболікай і адзеньнем. У ліпені яе прымусова закрыла Міністэрства надзвычайных сытуацый.

Ад сярэдзіны ліпеня па ўсёй Беларусі адбываецца масавая ліквідацыя недзяржаўных арганізацый. Пад пагрозай існаваньне дзясяткаў асьветніцкіх, праваабарончых, дабрачынных, спажывецкіх, дасьледчых і іншых арганізацый. Іх прадстаўнікоў затрымліваюць, праводзяць у іх дома і ў офісах ператрусы, арыштоўваюць рахункі.

Агулам праваабарончы цэнтар «Вясна» паведамляў пра як найменей 270 зьліквідаваных недзяржаўных арганізацый зь ліпеня гэтага году.

Ліквідацыя недзяржаўных арганізацый у Беларусі

У красавіку міністар замежных спраў Беларусі Ўладзімер Макей заявіў, што ў адказ на заходнія санкцыі ў Беларусі можа быць зьнішчана грамадзянская супольнасьць.

«Любое далейшае ўзмацненьне жорсткасьці санкцый прывядзе да таго, што грамадзянская супольнасьць, пра якую яны клапоцяцца, перастане існаваць. І гэта будзе, я лічу, абсалютна абгрунтавана ў дадзенай сытуацыі», — сказаў Макей.

22 ліпеня Аляксандар Лукашэнка заявіў пра зачыстку недзяржаўных арганізацый.

«Так і ўрад, і МЗС пабеглі за „дэмакратыяй“ і пастваралі ў нас (хай Макей ізноў ня прыме на свой рахунак, гэта і да яго яшчэ было, яму гэта ў спадчыну дасталася, трэба цяпер разграбаць), і мы атрымалі пад 2 тысячы на невялікую краіну НДА, НКА, бандытаў і замежных агентаў. Ну і што, дэмакратыю атрымалі?»

«Ідзе зачыстка. Вы думаеце, гэта проста? Там ужо тысячы людзей працуюць, нашых людзей, і ў асноўным з павернутымі, прамытымі за чужыя грошы мазгамі», — сказаў Лукашэнка.

30 ліпеня Лукашэнка заявіў, што «пад выглядам дабрачыннасьці некамэрцыйныя арганізацыі адпрацоўваюць чужую палітычную замову». Ён сказаў, што розных недзяржаўных фондаў, прыватных установаў, праваабарончых арганізацый у Беларусі было паўтары тысячы.

«У выніку праведзеных мерапрыемстваў выдзелена 185 дэструкцыйных структураў, якія нясуць патэнцыйную пагрозу нацыянальнай бясьпецы, у тым ліку прадстаўніцтва замежнай некамэрцыйнай арганізацыі, 71 рэспубліканскае і мясцовае грамадзкае аб’яднаньне, 113 установаў», — сказаў Лукашэнка на нарадзе з чыноўнікамі.

Зь сярэдзіны ліпеня адбываецца масавая ліквідацыя недзяржаўных арганізацыяў па ўсёй краіне. Пад пагрозай існаваньне дзясяткаў асьветніцкіх, праваабарончых, дабрачынных, спажывецкіх, дасьледчых і іншых арганізацыяў. Прадстаўнікоў установаў затрымліваюць, праводзяць у іх дома і ў офісах ператрусы, арыштоўваюць рахункі.

Па стане на канец 2021 году ўлады ліквідавалі як найменей 275 НДА, яшчэ шэраг — у працэсе ліквідацыі ці пад яе пагрозай.

Сярод ліквідаваных арганізацый

  • • Human Constanta
  • • Беларуская асацыяцыя журналістаў
  • • Беларускі Хэльсынскі камітэт
  • • Гродна Лайф Медыя
  • • Згуртаваньне беларусаў сьвету «Бацькаўшчына»
  • • Зьвяно
  • • Имена
  • • Мова нанова
  • • Офіс па правах людзей з інваліднасьцю
  • • ПЭН-цэнтар
  • • Прававая ініцыятыва
  • • Саюз беларускіх пісьменьнікаў
  • • Тэрыторыя правоў
  • • Цэнтар прававой трансфармацыі
  • • Экадом
  • Таварыства беларускай мовы
  • Дзіцячыя госьпісы ў Горадні і Віцебску

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG