Суд па справе мае адбыцца 17 лістапада. У прэс-службе тэлеканалу заявілі, што яна «нічога не можа сказаць наконт гэтага».
Паводле расейскіх законаў, максымальнае пакараньне, якое пагражае «Муз-ТВ», — штраф у мільён расейскіх рублёў (каля 14 тысяч даляраў) або прыпыненьне дзейнасьці на тэрмін да 90 сутак.
Паведамляецца, што на тэлеканал паскардзіліся за трансьляцыю ўручэньня прэміі «Муз-ТВ 2021» сёлета ў чэрвені. Тэлеканал паказаў у эфіры, у прыватнасьці, сьпевакоў Філіпа Кіркорава і Даву ў вобразе маладых, якія бяруць шлюб, а таксама блогераў Ігара Сіняка ў сукенцы і Даню Мілохіна ва ўборы напалову з сукенкі, напалову са смокінга.
Пасьля гэтага грамадзкая ўпаўнаважаная па абароне сям’і Вольга Баранец напісала заяву ў паліцыю, а Раскамнагляд паабяцаў праверыць запіс эфіру на прадмет парушэньня закону аб забароне так званай гей-прапаганды непаўналетнім.
