Пакараньне прадугледжваецца і за атаясамленьне мэтаў камуністаў і нацысцкай Нямеччыны ў Другую сусьветную вайну, і за непрызнаньне гуманітарнай місіі СССР пры вызваленьні краін Эўропы. Дакумэнт унесены ў ніжнюю палату групай дэпутатаў і сэнатараў.
Забарона на гэтыя дзеяньні была прынятая парлямэнтам раней у гэтым годзе, закон падпісаў прэзыдэнт Уладзімір Пуцін. Адказнасьць за парушэньні ў ім не ўстанаўлівалася. Новы дакумэнт прапануе штрафаваць грамадзян на пяць тысяч рублёў ці арыштоўваць на 15 сутак. Штрафы для службовых і юрыдычных асоб будуць складаць да 100 тысяч рублёў. Для іх прадугледжана таксама пакараньне ў выглядзе прыпыненьня працы на тэрмін да трох месяцаў.
Перад прыняцьцем закона аб забароне адмаўленьня ролі СССР і атаясамліваньня мэтаў камуністаў і нацыстаў яго крытыкаваў шэраг гісторыкаў.
Адзначалася, што фармулёўкі закона дазваляюць абмежаваць свабодную гістарычную дыскусію, у прыватнасьці аб ролі СССР у разьвязваньні Другой сусьветнай вайны, аб укладзе іншых краін у перамозе ў вайне, і аб пасьляваенным падзеле сьвету, пры якім Масква ўключыла ў зону свайго ўплыву краіны Ўсходняй і Цэнтральнай Эўропы, што ў многіх зь іх разглядаецца як акупацыя Савецкім Саюзам.
