Лінкі ўнівэрсальнага доступу

Фінскі міністар агучыў Макею ідэю Сьвятланы Ціханоўскай, — Франак Вячорка


Пэка Хаавіста

Падчас сустрэчы ў Нью-Ёрку з Уладзімерам Макеем фінскі міністар замежных справаў Пэка Хаавіста прапанаваў удзел ва ўрэгуляваньні беларускага крызісу. Раней яго аб гэтым прасіла Сьвятлана Ціханоўская.

Фінскі міністар сказаў, што давёў Макею інфармацыю аб тым, што Фінляндыя гатовая ўзяць удзел ва ўрэгуляваньні беларускага крызісу ў рамках плятформы АБСЭ. Менавіта пляцоўку Парлямэнцкай асамблеі АБСЭ як інструмэнту дыялёгу паміж уладай Лукашэнкі і грамадзтвам неаднаразова прапаноўваў Офіс Сьвятланы Ціханоўскай.

Як расказаў Свабодзе дарадца Ціханоўскай Францішак Вячорка, яна ўжо сустракалася зь міністрам Хаавіста ў сакавіку і абмяркоўвала тэму перамоваў.

«Няма альтэрнатывы перамовам»

«Сьвятлана Ціханоўская прапанавала тады, каб Фінляндыя (як варыянты — Швайцарыя і Аўстрыя) сталі мэдыятарамі або арганізатарамі пляцоўкі да перамоваў. Гэтая ж ідэя, наколькі мы ведаем, гучала і падчас сустрэчы міністра Макея і Хаавіста. Але, наколькі нам вядома, безвынікова. Але мы ў любым разе ня трацім надзею і працягваем настойваць на перамовах. Таму што любы сцэнар, незалежна ад таго, як сытуацыя будзе паварочвацца, ён закончыцца ўсё роўна перамовамі і новымі выбарамі. А перад тым вызваленьнем палітвязьняў. Няма альтэрнатывы перамовам», — кажа Вячорка.

Дарадца Ціханоўскай дадаў, што сустрэча ў Нью-Ёрку ня стала для яго сакрэтам. Ён падкрэсьлівае, што яна ні ў якім разе не азначае прызнаньне або легітымізацыю рэжыму Лукашэнкі Захадам.

Паводле яго, акрамя перамоваў і мэдыяцыйнай ролі Фінляндыі, падчас сакавіцкага візыту Ціханоўскай у Хэльсынкі ішла гаворка пра канфэрэнцыю высокага ўзроўню, прысьвечаную Беларусі, якая ўжо ў працэсе падрыхтоўкі. Тады Ціханоўская прапаноўвала Фінляндыі стаць адным зь яе суарганізатараў.

Міністар замежных спраў Фінляндыі Пэка Хаавіста і Сьвятлана Ціханоўская
Міністар замежных спраў Фінляндыі Пэка Хаавіста і Сьвятлана Ціханоўская

«У Беларусі павінны паважацца правы чалавека, а апазыцыю трэба залучыць да сапраўднага дыялёгу для выхаду з крызісу. Фінляндыя працягне падтрымліваць гэтыя намаганьні, у прыватнасьці ў АБСЭ», — напісаў тады ў Твітэры Хаавіста па выніках сустрэчы са Святланай Ціханоўскай у Хэльсынкі, назваўшы дыскусію «выдатнай».

«Ня можа быць дыялёгу і перамоваў паміж Лукашэнкам і Захадам, гэта нікуды не прывядзе»

Чаму такія ролі прапанавалі Фінляндыі? Вячорка кажа, што гэтая краіна гістарычна паміж рознымі бакамі і мае досьвед у арганізацыі перамоваў. Акрамя таго, у яе добрыя кантакты як з Расеяй, так і з Захадам.

«Мы зацікаўленыя ў тым, каб і за сталом перамоваў, і ў ролі мэдыятараў, былі розныя ўдзельнікі, бо гэта гарантуе выканальнасьць дасягнутых абавязкаў, узятых бакамі падчас перамоваў. І гэта таксама паслужыць дысцыплінарным стымулам для рэжыму. Галоўнае, што падчас усіх размоваў пра перамовы і дыялёг мы нагадваем, што ня можа быць ніякіх перамоваў пра Беларусь без беларусаў. Ня можа быць дыялёгу і перамоваў паміж Лукашэнкам і Захадам, гэта нікуды не прывядзе. Павінны быць перамовы зь беларускім народам у першую чаргу і ўнутры беларускага грамадзтва зь міжнароднай мэдыяцыяй», — дадаў Франак Вячорка.

Дарадца Сьвятланы Ціханоўскай перакананы, што сярод усіх міністраў Эўразьвязу і дэмакратычнага сьвету ёсьць разуменьне і кансэнсус, што Аляксандар Лукашэнка павінен сысьці. «Але ўсе зацікаўленыя ў тым, каб гэты сыход, транзыт улады адбыўся мірна і бяз стратаў для беларускага народу». — мяркуе палітык.

Фінляндыя традыцыйна лічыцца адным з уплывовых мэдыятараў у міжнародных канфліктах. Менавіта ў Хэльсынкі ў 1975 годзе была падпісаная дэклярацыя, на моцы якой узьнікла АБСЭ. У 2008 годзе фінскі дыплямат і былы прэзыдэнт Марці Ахцісаары атрымаў Нобэлеўскую прэмію міру за ўрэгуляваньне канфліктаў на розных кантынэнтах цягам 30 гадоў.

Кожны год у сярэдзіне лістапада ў Фінляндыі адзначаецца Дзень Ахцісаары. Уменьне вырашаць канфлікты лічыцца ў Фінляндыі адным з найбольш каштоўных навыкаў. Дзеці пачынаюць вучацца гэтаму яшчэ ў сярэдняй школе на спэцыяльных занятках.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG