Лінкі ўнівэрсальнага доступу

Беларускія памежнікі паведамілі, што з тэрыторыі Ўкраіны абстралялі памежны слуп, раструшчылі дзяржаўны герб


Абстраляны памежны слуп, фота Дзяржаўнага памежнага камітэту Беларусі

Паводле Дзяржаўнага памежнага камітэту, інцыдэнт адбыўся на ўчастку Пінскага памежнага атраду.

Як адзначаецца на сайце ведамства, пры аглядзе памежнага знаку супрацоўнікі заставы «Сварынь» выявілі пашкоджаньні самога слупа, а таксама шыльды з выявай афіцыйнага гербу.

Зафіксавана, што драўляныя і плястыкавыя элемэнты маюць вялікую колькасьць прабоін ад дробу, герб практычна раструшчаны. Памежнікі мяркуюць, што стралялі з паляўнічай зброі.

Па выніках сустрэчы з украінскімі калегамі бакі прыйшлі да высновы, што стралялі з тэрыторыі Ўкраіны. Цяпер ідзе разбор інцыдэнту.

Як паведаміў Свабодзе прэсавы сакратар Дзяржаўнай памежнай службы Андрэй Дземчанка, тое, што знак на мяжы зь Беларусьсю пашкоджаны, выявіў памежны нарад Луцкага атраду ўкраінскай памежнай службы. І адразу пра гэта паведамілі беларускім калегам і супрацоўнікам Нацыянальнай паліцыі Ўкраіны.

«Характар пашкоджаньняў сьведчыў пра магчымае выкарыстаньне паляўнічай стрэльбы. У той жа час балоціста-хмызьняковая мясцовасьць на тым напрамку ўскладняе пешы рух асобаў, і прыкметаў знаходжаньня людзей каля памежнага знаку ня выяўлена. Разам з тым знак разьмешчаны побач з каналам, які злучае азёры гэтай мясцовасьці, таму не выключаецца, што пашкодзіць знак маглі парушальнікі, якія праходзілі па канале на чоўне», — сказаў Андрэй Дземчанка.

Паводле яго, у часе праверкі на мясцовасьці не знайшлі гільзаў ад паляўнічай зброі. «Зь беларускім бокам правялі памежна-прадстаўнічую сустрэчу, на якой беларускі бок ня выказаў прэтэнзій ці абвінавачаньняў на адрас украінскіх памежнікаў», — дадаў прэсавы сакратар Дзяржаўнай памежнай службы Ўкраіны Андрэй Дземчанка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG