Лінкі ўнівэрсальнага доступу

Стрэлы ў паветра і сьлезацечны газ: Літва намагаецца стрымаць на мяжы плынь мігрантаў зь Беларусі


Літоўскі памежнік патрулюе мяжу, архіўнае фота

Літоўскія памежнікі стралялі ў паветра і прымянілі газ.

У Літве за мінулыя содні затрымалі 116 мігрантаў, якія перайшлі беларуска-літоўскую мяжу па-за пунктамі пропуску, паведаміла Служба аховы дзяржаўнай мяжы.

Група з 8 чалавек спрабавала атакаваць патруль. Памежнікі пусьцілі сьлезацечны газ і зрабілі папераджальныя стрэлы ў паветра.

Памежная служба адзначыла, што мігранты пачалі ісьці і цераз участкі мяжы, абсталяваныя сучаснай сыстэмай кантролю. Раней яны ўнікалі такіх тэрыторый.

Агульная колькасьць нерэгулярных мігрантаў зь Беларусі ў Літве дасягнула 938 чалавек. Летась за ўвесь год затрымалі 81.

У пятніцу Літва ўвяла рэжым экстрэмальнай сытуацыі ў сувязі з рэзкім ростам нерэгулярнай міграцыі зь Беларусі.

«Лукашэнка спрабуе ператварыць міграцыю ў зброю, каб аслабіць нашыя санкцыі», — напісаў у твітэры міністар замежных спраў Літвы Гарбыэлюс Ландсбэргіс.

Афіцыйная Вільня абвінавачвае Беларусь у нядбайнасьці і нават у спрыяньні перапраўцы замежнікаў да мяжы Літвы. Міністарка ўнутраных спраў Літвы Агне Білатайце заявіла, што рост колькасьці мігрантаў — гэта сьвядомая палітыка беларускіх уладаў супраць Літвы. Яна назвала тое, што адбываецца, пачаткам гібрыднай вайны.

Беларускія ўлады мэтанакіравана перакідаюць мігрантаў да мяжы, завабліваючы іх у краіну пакетнымі прапановамі дзяржаўнага турыстычнага агенцтва (напрыклад, рэйс з Багдаду або Стамбулу і даезд да літоўскай мяжы). Такую вэрсію ў інтэрвію Financial Times раней выказаў Габрыелюс Ландсбергіс.

Кіраўніца Эўракамісіі назвала плынь мігрантаў зь Беларусі палітычна матываванай і заявіла, што Эўразьвяз узмоцніць падтрымку Літвы, перадае Reform.by.

2 ліпеня пра ўзмацненьне аховы мяжы зь Беларусьсю паведаміла і Латвія. З эўрапейскага агенцтва Frontex ў Латвію ўжо прыехалі некалькі афіцэраў з тэхнічнымі сродкамі і аўтамабілем для патруляваньня мяжы, паведаміў прадстаўнік памежнай службы тэлеканалу LTV7.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG