Больш за 500 настаўнікаў, 427 выкладчыкаў. Колькі спэцыялістаў не хапае ў сферы адукацыі

У 2020 годзе ў Беларусі працавалі 84,6 тысячы настаўнікаў, 17,3 тысячы прафэсараў-выкладчыкаў. Усяго ў сфэры адукацыі працавалі 400,6 тысячы чалавек. Сярэдні заробак у настаўнікаў у 2020 годзе — 1042,3 рубля, прафэсараў-выкладчыкаў — 1536,5 рубля, падлічыў Белстат.

Глядзім, колькі цяпер не хапае настаўнікаў і выкладчыкаў у Беларусі.

Шукаюць 541 настаўніка

У рэспубліканскім банку вакансій і рэзюмэ знаходзім 541 вакансію для настаўніка па ўсёй Беларусі. Гэта настаўнікі ўсіх профіляў, уключна з настаўнікамі-дэфэктолягамі. Большасьць вакансій — профільныя настаўнікі-прадметнікі.

У Менску шукаюць 206 настаўнікаў, з абласьцей найбольш не стае ў Горадзенскай вобласьці — тут 150 вакансій настаўнікаў.

ГЛЯДЗІЦЕ ТАКСАМА:

Міністар адукацыі: прыватныя садкі і школы сталі апірышчам для «каляровай рэвалюцыі»

Колькі прапануюць настаўнікам

Паводле Белстату, намінальны сярэдні заробак у чэрвені гэтага году ў сфэры адукацыі склаў 1021,7 рубля.

Але ў прапановах вакансій пазначаны заробак 600–800 рублёў.

Напрыклад, у Менску настаўніка пачатковых клясаў шукаюць на заробак у 800 рублёў.

Настаўніку расейскай мовы і літаратуры ў Горадні прапануюць 650 рублёў.

У Верцялішках Горадзенскай вобласьці патрабуецца настаўнік пачатковых клясаў на 550 рублёў.

У Бабруйску ж настаўніку пачатковых клясаў гатовыя прапанаваць толькі 450 рублёў.

Колькі шукаюць выкладчыкаў

У базе вакансій 426 вакансій для выкладчыкаў, гэта як выкладчыкі каледжаў і ВНУ, так і выкладчыкі спартовых школаў. У Менску патрабуецца 120 выкладчыкаў. Пасьля Менску найбольш выкладчыкаў не стае ў Віцебскай вобласьці — 105 чалавек.

ГЛЯДЗІЦЕ ТАКСАМА:

Настаўніка са Смаргоняў асудзілі на 1,5 года калёніі за «няправільны» урок. Мы пагаварылі зь ім

Колькі прапануюць выкладчыкам

Заробкі ў выкладчыкаў ня надта адрозьніваюцца ад настаўніцкіх, а часам і саступаюць ім. Напрыклад, у Гуманітарны каледж пры Горадзенскім унівэрсытэце імя Янкі Купалы шукаюць выкладчыка фізыкі і інфарматыкі на заробак 600 рублёў.

Старшаму выкладчыку ў БНТУ абяцаюць 800 рублёў на месяц.

У Полацкім дзяржаўным унівэрсытэце выкладчыку замежнай мовы на 0,5 стаўкі прапануюць 500 рублёў.

У Горадзенскім каледжы мастацтваў выкладчыку прапануюць ад 600 рублёў.

У Віцебскім дзяржаўным унівэрсытэце імя Машэрава выкладчыку на поўную стаўку прапануюць 634,44 рубля.

ГЛЯДЗІЦЕ ТАКСАМА:

3,1% ВУП, 628 мільёнаў рублёў падаткаў. Які ўнёсак робяць «іпэшнікі» ў эканоміку

ГЛЯДЗІЦЕ ТАКСАМА:

Больш за 8% сталічных выпускнікоў сёлета зьехалі за мяжу. Чыноўніца: «Кепска выхоўваем»