Стала вядома, у чым абвінавачваюць затрыманых 9 ліпеня валянтэраў фонду «Страна для жизни», інфармуе Праваабарончы цэнтар «Вясна». Іх затрымалі падчас «шырокамаштабнай апэрацыі КДБ па зачыстцы ад радыкальна настроеных асобаў». Сярод затрыманых валянтэраў:
- 37-гадовая Марына Дуброўская;
- 41-гадовы Антон Сташэўскі;
- 46-гадовая Юлія Сырых;
- 44-гадовая Тацяна Астроўская.
12 ліпеня ім афіцыйна выставілі абвінавачаньні паводле арт. 361-2 Крымінальнага кодэксу (фінансаваньне дзейнасьці экстрэмісцкага фармаваньня). Па гэтым артыкуле ім пагражае да 6 гадоў пазбаўленьня волі.
Усіх чацьвярых затрыманых у справе фонду зьмясьцілі пад варту на два месяцы ў СІЗА-1 на вуліцы Валадарскага ў Менску.
Тым часам у Гомлі працягваецца суд над заснавальнікам каналу «Страна для жизни» Сяргеем Ціханоўскім і групай іншых палітвязьняў. Падрабязнасьцяў судовых паседжаньняў вельмі мала, аднак вядома, што Ціханоўскі віны не прызнае.
