Лінкі ўнівэрсальнага доступу

Мінінфармацыі ня ўбачыла парушэньня ў нецэнзурных выказваньнях дзяржаўных журналістаў


Аўтар СТВ Рыгор Азаронак. Менск, 23 сакавіка 2021 году.
Аўтар СТВ Рыгор Азаронак. Менск, 23 сакавіка 2021 году.

Гомельскі валянтэр Ільля Міронаў атрымаў адказы на свае звароты ў Міністэрства інфармацыі.

У скаргах ён прасіў прыцягнуць да адказнасьці аўтараў перадач на СТВ Рыгора Азаронка і Юлію Арцюх за выказваньні, якія не адпавядаюць рэальнасьці, і нецэнзурную лексыку.

Пра што гаворка?

Ільля Міронаў палічыў, што аўтар СТВ Рыгор Азаронак парушае закон. У сваім тэлеграм-канале супрацоўнік дзяржаўнай тэлевізіі разьмясьціў здымак Сьвятланы Ціханоўскай і напісаў камэнтар да яго, выкарыстаўшы нецэнзурную лаянку і абразы. (З этычных прычынаў Радыё Свабода ня можа цытаваць гэтыя выказваньні).

Юлія Арцюх у сваёй перадачы «Нягладка» на тэлеканале СТВ казала, што «чалавека, які перажыў вайну, ніколі не прымусіш падняць бел-чырвона-белы сьцяг над галавой».

У звароце ў Міністэрства інфармацыі Ільля Міронаў зазначыў, што Васіль Быкаў – беларускі пісьменьнік, які перажыў вайну, так казаў пра бел-чырвона-белы сьцяг:

«Iншага сьцяга ў нас няма i ня можа быць». Першы кіраўнік Беларусі Станіслаў Шушкевіч, які таксама бачыў вайну, паважліва выказваўся пра бел-чырвона-белы сьцяг.

«Ён быў зацьверджаны ў 1918 годзе, калі была ўтворана БНР. А тое, што прыдумалі надмагільны вянок з арнамэнтам – гэта выдумкі людзей, якія ня маюць уяўленьня пра геральдыку».

«Артыкул 34 Канстытуцыі гарантуе грамадзянам Беларусі права на атрыманьне поўнай, праўдзівай і актуальнай інфармацыі. Закон «Аб СМІ» гаворыць аб праўдзівасьці інфармацыі. Міністэрства інфармацыі мае права выносіць пісьмовыя папярэджаньні за парушэньне заканадаўства. Патрабую вынесьці папярэджаньне Юліі Арцюх і зьняпраўдзіць распаўсюджаную ёй інфармацыю», – напісаў у скарзе Ільля Міронаў.

Што адказала міністэрства

Наконт выказваньняў Рыгора Азаронка міністэрства адказала:

«Калі вы лічыце, што інфармацыя, якую распаўсюдзіў Рыгор Азаронак, зьневажае гонар, годнасьць і дзелавую рэпутацыю канкрэтнай фізычнай асобы, то гэтая асоба можа зьвярнуцца ў суд. Толькі суд мае права вызначыць, ці былі распаўсюджаны такія зьвесткі і ці зьневажаюць яны гонар, годнасьць і дзелавую рэпутацыю канкрэтнай фізычнай асобы».

Міністэрства інфармацыі адмовілася выносіць папярэджаньне Юліі Арцюх:

«Аўтарская рубрыка Юліі Арцюх «Нягладка» не адносіцца да афіцыйных матэрыялаў, якія распаўсюджваюцца ад імя органаў дзяржаўнага кіраваньня. У гэтай рубрыцы аўтар выказвае сваю думку. Права на выказваньне сваёй думкі журналіст мае ў адпаведнасьці з артыкулам 34 закону «Аб СМІ». Гэта асабістая думка і ня можа разглядацца як афіцыйнае паведамленьне», – патлумачыў намесьнік міністра Кунцэвіч.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG