23 чэрвеня а 21:39 на Лукомскай ДРЭС ня вытрымаў сьпёкі і разбурыўся трансфарматар напругі, ад чаго адключылася ўся станцыя, вынікае з інфармацыі Мінэнэрга.
Перабоі з электрычнасьцю здарыліся ў Віцебскай і Магілёўскай абласьцях. У Магілёве на нейкі час у кранах прапала вада.
Над нафтаперапрацоўчым заводам у Наваполацку запалалі факелы. Гэтак спрацавала супрацьаварыйная абарона пасьля адключэньня электраэнэргіі і спыненьня ўстановак на «Гідракрэкінгу» і «Поліэтылене».
Сытуацыя няштатная, але тэхналягічны працэс на «Нафтане» і «Паліміры» цалкам пад кантролем, піша «Вестник Нафтана».
Адначасова з запускам Лукомскай дзяржаўнай раённай электрастанцыі падключалі турбагенэратары менскай ЦЭЦ-4 і запусьцілі газавыя турбіны ў Берасьці.
Прыдалася і БелАЭС. Безь яе нагрузка пры адключэньні Лукомскай ДРЭС была б удвая большай, паведаміў першы намесьнік гендырэктара «Белэнэрга» Ўладзімер Баброў.
Пра поўнае аднаўленьне электразабесьпячэньня ў Магілёўскай і Віцебскай абласьцях Мінэнэрга паведаміла ў 7:51.
Папярэдняя буйная аварыя на Лукомскай ДРЭС здарылася 25 чэрвеня 2008 году. Тады безь сьвятла засталіся спажыўцы па ўсёй Беларусі.
Першы энэргаблёк станцыі запусьцілі ў 1969 годзе.
