«Потым скажуць яшчэ, што памілаваньня прасіла, чаго яна на самой справе не рабіла. Альбо напішуць, што яна прызнаецца ў нечым. Таму Віталіна прасіла перадаць, што калі потым штосьці дзесьці вылезе, то каб усе ведалі, што яе прымусілі, — сказала Свабодзе маці дзяўчыны Натальля Бандарэнка.
На спатканьні 4 чэрвеня маці Віталіі Натальля сказала маці, што ў сярэдзіне сакавіка правяла 10 сутак у карцары. Аднак за што, удакладніць не пасьпела.
«Калі закранулі гэтую тэму, пачулі ў трубцы, што да нас падключыліся. Пасьля гэтага мы пачалі гаварыць глупствы ўсякія. У выніку так і не вярнуліся да моманту карцару».
Таксама Натальля расказала, што дачка нудзіцца ад інфармацыйнага вакуўму. Нягледзячы на тое, што Віталіі пішуць шмат людзей, лісты яна атрымлівае толькі ад маці, бабулі, цёткі і брата.
«Дачка сказала: „Я ўжо хадзіла да начальніка, пыталася, чаму не аддаяце лісты падтрымкі. Я дакладна ведаю, што яны прыходзяць“. Ён ёй адказаў: „Будзеш адсюль выходзіць, я табе іх усе дам, тады і прачытаеш“».
18 чэрвеня пракуратура Берасьця заявіла, што Віталю Бандарэнку ў карцар не зьмяшчалі, пустых аркушаў падпісваць не давалі і ў перапісцы не абмяжоўвалі.
«Падчас праверкі з выбыцьцём пракурорскага работніка ў пазначаную пэнітэнцыярную ўстанову Віталія Бандарэнка паведаміла, што за час ейнага знаходжаньня пад вартай у СІЗА ніякіх чыстых аркушаў яна не падпісвала. Пры гэтым падчас спатканьняў з сваёй маці на гэтую тэму яны не размаўлялі», — гаворыцца ў паведамленьні пракуратуры Берасьцейскай вобласьці.
Пракуратура лічыць, што Віталія Бандарэнка пераблытала карцар з «камэрай зборнага аддзяленьня», у якой яе трымалі тры гадзіны, пакуль афармлялі дакумэнты пасьля яе паступленьня ў калёнію. Карцарам Бандарэнку не каралі, сьцьвярджае пракуратура. І дадае, што «фізычнага ўзьдзеяньня на яе ў сьледчым ізалятары не рабілася, цялесных пашкоджаньняў у яе няма».
Што да ліставаньня, то ў пракуратуры заявілі, што Віталія Бандарэнка «без абмежаваньняў карыстаецца сваім правам на перапіску».
19-гадовая Віталія Бандарэнка ў лютым вярнулася ў Беларусь з-за мяжы, каб пабачыць каханага хлопца. Але яе затрымалі. 21 траўня дзяўчыне прысудзілі 4 гады калёніі агульнага рэжыму за нібыта ўдзел у масавых беспарадках у Берасьці. Яе хлопца яшчэ ў сакавіку пакаралі 3 гадамі выхаваўчай калёніі.