Лінкі ўнівэрсальнага доступу

«У поўнай інфармацыйнай ізаляцыі». Што піша родным Рыгор Кастусёў, якога вінавацяць у спробе дзяржаўнага перавароту


Рыгор Кастусёў, архіўнае фота

Старшыню Партыі БНФ Рыгора Кастусёва, якога вінавацяць у спробе дзяржаўнага перавароту, два месяцы трымаюць у СІЗА КДБ. Паводле родных, яго наведвае адвакатка, але пра расьсьледаваньне справы гаварыць устрымліваецца. Сам жа зьняволены палітык напісаў родным: «Няма ніякіх зрухаў, усё заціхла».

Без тэлевізара і газэт

Дзеці Рыгора Кастусёва кажуць, што сталі часьцей атрымліваць лісты ад бацькі ў параўнаньні зь першым месяцам ягонай няволі. У адным зь іх ён напісаў, што ў камэры больш няма тэлевізара. Яго забраў сукамэрнік, якога перавялі ў іншае месца.

«Цяпер ня ведаем, што адбываецца ў Беларусі і сьвеце», — наракае ён у допісе старэйшай дачцэ Галіне. У наступным лісьце дадае, што апынуўся «ў поўнай інфармацыйнай ізаляцыі».

Паводле яшчэ адной дачкі Кацярыны, родныя сукамэрнікаў спрабавалі перадаць зьняволеным тэлевізар, але, наколькі ёй вядома, ім не дазволілі.

Кастусёў піша, што ў камэру «калі-нікалі даходзіць адна газэта на тыдзень», а калі не, то ён «стараецца чытаць што-небудзь цікавае, калі і такое трапляе ў рукі». З газэты, назвы якой не называе, даведаўся пра сьмерць Вітольда Ашурка.

Сядзіць зь цікавымі людзьмі, падтрымліваюць адзін аднаго

Пакуль у камэры стаяў тэлевізар, Кастусёў пасьпеў паглядзець фільм «Убить Президента».

«Там вельмі шмат нарэзак і перафарматаваньняў, нават не маіх слоў на расейскай мове», — пракамэнтаваў ён убачанае ў лісьце Галіне.

Па словах дачок, на здароўе зьняволены бацька не наракае: адчувае сябе добра, у камэры бывае сьпякотна і «ўсе дні аднолькавыя».

«Сяджу зь цікавымі людзьмі, — піша ён дзецям пра сукамэрнікаў. — Стараемся падтрымліваць адзін аднаго, як бы кепска ні было на душы ў некаторыя моманты».

Кастусёў у кожным лісьце пытае пра родных, цешыцца, што яны мацуюцца, ды прызнаецца, што «вельмі сумуе» па іх.

Просіць паплечнікаў «чыркануць пару радкоў»

У лістах партыец цікавіцца ў дачок, як маюцца ў Шклове «нашыя сябры» і просіць пераказаць ім, «каб чырканулі яму пару строчак». Турбуе яго, ці «спраўляецца жонка з агародам».

Унукам, кажа Галіна, дзед лісты піша асобна. У іх пытае, як вучацца, настаўляе, каб не кідалі факультатыву і трэніровак. Бядуе, што ня быў на выпускным.

Дзеці паведамілі Кастусёву, што неўзабаве пасьля яго арышту невядомыя «парэзалі колы ягонай машыны». Ён запытаў у Галіны, ці дужа патраціліся на новыя.

Пра затрыманьне Рыгора Кастусёва і іншых фігурантаў справы

Рыгора Кастусёва затрымалі ў Шклове 12 красавіка. У ягонай кватэры дзеці прыкметаў ператрусу не заўважылі. На стале ляжала цыдулка з імёнамі, як яны мяркуюць, тых, хто яго затрымліваў. У той жа дзень дачцэ Галіне сьледчы паведаміў, што бацька ў Менску.

13 красавіка на лецішчы Галіны і ейнага мужа Дзьмітрыя апэратыўнікі правялі ператрус: забралі кампутары, кнігі, носьбіты інфармацыі ды страйкбольны аўтамат. У гэтым доме ладзіліся розныя імпрэзы з удзелам вядомых у Беларусі дзеячаў культуры і палітыкі.

Затрыманьне Зянковіча, Кастусёва, Фядуты і справа «змоўшчыкаў». Што трэба ведаць

  • У Шклове ўвечары 12 красавіка затрымалі кіраўніка партыі БНФ Рыгора Кастусёва. Тады было вядома толькі, што ён праходзіць па крымінальнай справе і знаходзіцца ў СІЗА КДБ.
  • Увечары таго ж дня жонка беларускага паліттэхноляга Аляксандра Фядуты паведаміла пра яго зьнікненьне ў Маскве. 13 красавіка КДБ Беларусі паведаміў, што Фядута затрыманы.
  • У ноч на 14 красавіка стала вядома аб затрыманьні ў Маскве беларускага адваката з ЗША Юрася Зянковіча. Усе яны цяпер у менскім СІЗА КДБ.
Юрась Зянковіч, Аляксандар Фядута, Рыгор Кастусёў (зьлева направа)
Юрась Зянковіч, Аляксандар Фядута, Рыгор Кастусёў (зьлева направа)
  • Увечары 17 красавіка дзяржаўныя СМІ Беларусі паказалі заяву Аляксандра Лукашэнкі, што заходнія спэцслужбы рыхтавалі збройны мяцеж, а таксама замах на яго і на ягоных дзяцей.
  • Лукашэнка абвінаваціў у датычнасьці да падрыхтоўкі замаху затрыманых Зянковіча, Кастусёва і Фядуту.
  • Амаль сынхронна ФСБ Расеі заявіла, што яны сумесна з КДБ Беларусі спынілі меркаваную змову з удзелам Зянковіча і Фядуты, якія нібыта плянавалі 9 траўня «ажыцьцяўленьне вайсковага перавароту ў Беларусі па адпрацаваным сцэнары „каляровых рэвалюцый“ з прыцягненьнем мясцовых і ўкраінскіх нацыяналістаў, а таксама фізычную ліквідацыю Аляксандра Лукашэнкі».
  • У рэпартажы на беларускім дзяржаўным тэлеканале АНТ паказалі фрагмэнт відэаразмовы ў Zoom, у якой, акрамя Зянковіча, Кастусёва і Фядуты, удзельнічалі яшчэ чатыры чалавекі (усе жывуць у ЗША), нібыта ўдзельнікі змовы. У інтэрвію Свабодзе двое зь іх адкінулі абвінавачаньні (тут і тут).
  • Афіцыйныя прадстаўнікі ЗША і Польшчы назвалі абвінавачаньні ўладаў Беларусі і Расеі на свой бок няпраўдай.
  • 21 красавіка Ўладзімір Пуцін заявіў, што краіны Захаду ігнаруюць факты падрыхтоўкі «дзяржаўнага перавароту ў Беларусі» і «плянаваньня забойства» Аляксандра Лукашэнкі. Ён абвінаваціў удзельнікаў «змовы супраць Лукашэнкі» ў падрыхтоўцы масаванай кібэратакі на Беларусь.
  • 22 красавіка стала вядома, што старшыня Партыі БНФ Рыгор Кастусёў, палітоляг Аляксандар Фядута і юрыст Юры Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэксу).
  • 30 красавіка КДБ назваў імёны дзевяці абвінавачаных. Гэта Аляксандар Фядута, Юры Зянковіч, Рыгор Кастусёў, Вольга Галубовіч, Дзьмітры Шчыгельскі, Аляксандар Перапечка, Павал Кулажанка, Віталь Макаранка, Ігар Макар. Акрамя Фядуты, Зянковіча і Кастусёва, у няволі трымаюць Вольгу Галубовіч.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG