Экстрадыцыі бізнэсоўца Ўладзіслава Клюшына патрабуюць ЗША, там яго падазраюць у інсайдэрскім гандлі на дзясяткі мільёнаў даляраў. Пра гэта Міністэрства юстыцыі Швайцарыі паведаміла карэспандэнту Радыё Свабода.
У 2018 годзе выданьне «Проект» называла Клюшына меркаваным аўтарам папулярнага палітычнага ананімнага тэлеграм-каналу «Незыгарь». Бізнэсовец дамогся абвяржэньня гэтай інфармацыі ў судзе, заявіўшы, што публікацыя паказвае яго як ненадзейнага бізнэс-партнэра.
У расьсьледаваньні выданьня «Проект» адзначалася, што тэлеграм-канал «Незыгарь» цесна зьвязаны з намесьнікам кіраўніка Адміністрацыі прэзыдэнта Расеі Аляксеем Громавым – былы прэс-сакратар Уладзіміра Пуціна лічыцца крамлёўскім куратарам расейскай тэлевізіі.
На допыце пасьля арышту ў Швайцарыі Клюшын заявіў, што выступае супраць экстрадыцыі. У сваіх скаргах Клюшын настойвае, што ён і яго кампанія «адыгрываюць стратэгічна важную ролю для ўраду Расеі», паведамляе выданьне «Открытые медиа».
Цяпер Уладзіслаў Клюшын утрымліваецца ў турме швайцарскага гораду Сыён у кантоне Вале, дзе ён быў затрыманы. Яго адмовіліся адпусьціць пад заклад паўтара мільёна франкаў (прыкладна 1,6 мільёна даляраў).
Расейскія ўлады арышт бізнэсоўца пакуль не камэнтавалі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў