Лінкі ўнівэрсальнага доступу

У Гомлі судзяць давераных асобаў Ціханоўскай. Падсудныя не прызналі віны

абноўлена

Тацяна Канеўская, якую судзяць за "масавыя беспарадкі"

У судзе Чыгуначнага раёну Гомля 12 красавіка пачаўся разгляд крымінальнай справы ў дачыненьні давераных асобаў Сьвятланы Ціханоўскай.

Гэта Тацяна Канеўская, Юры Ўласаў, Дзьмітры Івашкоў, Аляксандар Шабалін.

Падтрымаць іх прыйшлі больш за тры дзясяткі гамельчукоў, але ў судовую залю пусьцілі толькі журналістаў дзяржаўных СМІ. Незалежным забаранілі ўваход праз «каранавірус».

Не пусьцілі нават сына і мужа Тацяны Канеўскай. Сказалі — толькі па адным прадстаўніку ад сям'і.

Сваякам не дазволілі браць у судовую залю тэлефоны, прымусілі пакінуць іх на вахце суду ў адмысловай ячэйцы. Каля суду патрулюе АМАП. У судзе паставілі мэталадэтэктар.

Юрыя Ўласава затрымалі 7 жніўня ў сваім доме, Тацяну Канеўскую — 8 жніўня, Аляксандра Шабаліна — 6 жніўня, як і Дзьмітрыя Івашкова.

Дзьмітры атрымаў 15 сутак арышту, але пры затрыманьні яму моцна пашкодзілі нагу, яна пачала гнаіцца ў ІЧУ. Яго паклалі ў шпіталь, а потым выпусьцілі. Івашкоў хаваўся ад міліцыі да 27 верасьня, але ў той дзень ён выйшаў на марш пратэсту ў Гомлі і быў затрыманы.

Усе яны абвінавачваюцца ў «масавых беспарадках» (частка 2 артыкулу 293 Крымінальнага кодэксу) і «захопе будынкаў» (частка 1 артыкулу 292 Крымінальнага кодэксу).

Юры Ўласаў дадаткова абвінавачваецца ў «публічнай абразе прадстаўніка ўлады» (частка 1 артыкулу 369 Крымінальнага кодэксу).

Паводле часткі 2 артыкулу 293 КК абвінавачаным пагражае найбольшы тэрмін — да 8 гадоў пазбаўленьня волі.

Давераныя асобы Сьвятланы Ціханоўскай у Гомлі: першы зьлева Юры Ўласаў, трэці зьлева Аляксандр Шабалін, далей Дзьмітрый Івашкоў, Тацяна Канеўская.
Давераныя асобы Сьвятланы Ціханоўскай у Гомлі: першы зьлева Юры Ўласаў, трэці зьлева Аляксандр Шабалін, далей Дзьмітрый Івашкоў, Тацяна Канеўская.

Падсудныя не прызнаюць сваю віну

Аляксей Канеўскі — сын палітзьняволенай Тацяны Канеўскай у ліку нямногіх трапіў на першае паседжаньне суду і распавёў пра яго акалічнасьці.

«Ніхто з абвінавачаных сваю віну не прызнаў. Апроч таго, што яны нібыта плянавалі масавыя беспарадкі і захоп будынкаў, ім зачыталі абвінавачаньне, што яны стварылі тэлеграм-канал „Страна для жизни“ і такі ж Youtube-канал, а таксама „Беларусь 12 стоп“ (каналы Сяргея Ціханоўскага, — РС). У справе раптам аднекуль зьявіліся шэсьць пацярпелых. Калі яны ўсталі ў судзе, то ўсе ахнулі — бо такія вялікія мужчыны, вагой пад сто кіляграмаў, падобныя на сілавікоў», — зазначыў Аляксей Канеўскі.

Пацярпелых дапыталі ў закрытым рэжыме па іх просьбе. Сваякоў на момант допыту шасьці пацярпелых выдалілі з залі суду. Канеўскі дадаў, што маці трымаецца выдатна, яна ў гуморы.

«Толькі што канвой забараняў нам нават пераглядацца, сачылі, каб не было візуальнага кантакту. Калі мы глядзелі адзін на аднаго — адразу канвойны загароджваў нас сьпіной», — кажа сын палітзьняволенай.

Аляксей кажа, што абвінавачаньне было вельмі кепска чуваць, бо пракурор казаў вельмі ціха, і праз маску. Прасілі гаварыць гучней — але ніхто не адрэагаваў.

«Сяброў і нават сваякоў не пусьцілі ў залю нібыта праз каранавірус, але месцаў вольных было там дастаткова. Яшчэ зайшлі нейкія невядомыя нам людзі і занялі месцы. Напэўна, гэта міліцыянты», — кажа Аляксей. У сваякоў, якія былі на судзе, забралі тэлефоны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG