Лінкі ўнівэрсальнага доступу

BYPOL апублікаваў гуказапіс голасу, падобнага на экс-міністра Караева, які раіць ГУБАЗіКу: «Находите эту тварь и убирайте»


Сілавікі разганяюць пратэст каля стэлы, ідзе група ГУБАЗіК на чале зь Мікалаем Карпянковым(у цэнтры). Менск, жнівень 2020 году

У аўдыёзапісе, які апублікавала ініцыятыва BYPOL, беларусаў называюць «тлустымі абываталямі», а сілавікам ідзе загад забіваць тых, хто пагражае сілавікам або чыноўнікам.

Ініцыятыва BYPOL, куды ўваходзяць былыя сілавікі, якія адмовіліся служыць Лукашэнку і пайшлі ў адстаўку, арганізаваўшы за мяжой шэраг расьсьледаваньняў дзеяньняў былых калег у задушэньні пратэстаў у Беларусі, апублікавала новы аўдыёзапіс.

На ім чалавек, голас якога падобны да голасу былога міністра ўнутраных спраў Беларусі Юрыя Караева, нібыта выступае перад супрацоўнікамі ГУБАЗіК. У прыватнасьці, голас на запісе прызнае, што сілавікі абсалютна не былі гатовыя да пратэстаў такога маштабу. Разьлік быў на тое, што пратэстоўцаў будзе столькі, колькі было ў 2010 годзе ці ў іншыя гады. Аднак гэта быў істотны пралік.

«У вас на ўсё хапіла сілаў. Я скажу так — у першыя 4 дні „групы атакі“, пра якія ўжо ведае прэзыдэнт [маецца на ўвазе Лукашэнка], разам з АМАПам і Ўнутранымі войскамі ўратавалі краіну».

У якасьці прыкладу для спэцслужбаў Беларусі чалавек з голасам, падобным да Караева, прыводзіць вайну ў Чачэніі, калі расейскі спэцназ пачаў знаходзіў чачэнскіх ваяроў у іх лягерах, па-за часам непасрэдных баёў.

Беларускі народ голас на запісе абвінаваціў у тым, што ён «тупаваты», «ня бачыць далей за 5 мэтраў ад носу» і наогул гэта «тлустыя абываталі». А таксама ў «абмежаваных патрэбах», якія быццам складаюцца толькі з асабістага дабрабыту. Сілавікі ж, на яго думку, «гасударавы людзі».

Па словах чалавека на гуказапісе, «абываталі» пра лёс Беларусі думаюць «ад нуды», а сілавікам будуць удзячныя толькі, «калі пазбавяцца іх і схуднеюць да касьцей».

«Перасьледуйце тых, хто пагражае чыноўнікам і вам. Усё кідайце, шукайце гэтую пачвару і прыбірайце. Такі вам мой наказ» (у арыгінале: «Всё бросайте, находите эту тварь и убирайте. Вот такое моё вам наставление»).

У канцы прыведзенага аўдыязапісу прыводзіцца выраз, які прыдумаў чалавек, чый голас нагадвае голас Караева: «Сіняй ср*кай выратавалі краіну».

Пасьля публікацыі аўдыёзапісу тое, што голас на ім належыць Караеву, напісаў блізкі да Белтэлерадыёкампаніі праўладны тэлеграм-канал «Желтые сливы».

Ён зьвярнуў увагу, што на аўдыё чуваць, што Караеў кажа пра тых, хто пагражае чыноўнікам і сілавікам, не «убивайте», а «убирайте». BYPOL даў у расшыфроўцы слова «убивайте».

Камэнтару адносна аўдыёзапісу ад МУС пакуль няма.

Пасьля 9 жніўня супраць міліцыянтаў і супрацоўнікаў іншых сілавых ведамстваў не заведзена ніводнай крымінальнай справы за перавышэньне паўнамоцтваў, катаваньні і па іншых крымінальных артыкулах.

Ціханоўская: «Гэтая прамова — напамін не маўчаць, не згаджацца, не спыняцца»

На запіс меркаванай прамовы Караева ГУБАЗіКу, апублікаваны BYPOL, адрэагавала Сьвятлана Ціханоўская:


«Яго тады прыбралі з пасады міністра ўнутраных спраў, і ў якасьці пажаданьня ён сказаў сваім баявікам, што беларускі народ „тупаваты і недалёкі“. Што мы „ніколі ні за кога“. Што нам „нельга даць паспрабаваць параўнаньне, як можа быць па-іншаму“. Што трэба „кідаць усё, знаходзіць нас і забіваць“. Таму што ім „лепш ведаць, як нам жыць“. Таму што яны „людзі гасударавы“. А мы — „тлустыя абываталі“.

У яго прамовы шмат слоў, якія паказваюць, як думаюць людзі, якія занадта доўга прабылі ва ўладзе і занадта доўга не былі пакараныя. Гэтая прамова — напамін не маўчаць, не згаджацца, не спыняцца. Інакш яны прывыкнуць, што можна ўрывацца ў нашыя лякарні, школы, крамы, дамы — і прыстаўляць нам рулю да скроні. А потым „прыдумляць мэмы“ і сьмяяцца над тысячамі змучаных і згвалчаных людзей.

Але нават ня гэта галоўнае ў яго прамове. Я ўбачыла ў ёй і іншае. У гэтай прамовы Караеў расказаў, як мы пераможам.

Ён гаворыць, калі мы паўсюль, калі мы змагаемся кожны дзень, калі не даём ім апамятацца — яны ня могуць нападаць, а могуць толькі абараняцца. Яго словы даказваюць, што мы ўсё рабілі правільна і нам трэба працягваць кожны дзень: інфармацыя, вуліцы, партызаншчына, міжнародны ціск, выстройваньне арганізацый. Яго словы даказваюць, што другой хвалі пратэсту рэжым ня вытрымае. І што ў іх можа атрымацца, толькі калі мы самі вырашым, што прайгралі, і спынім супраціў.

І мы працягнем змагацца за сваю свабоду, а значыць, гэта будучыня ўжо хутка. Так, яна патрабуе гераічных намаганьняў, але мы і нашы дзеці павінны даведацца, як гэта — жыць па-іншаму»,— цытуе Ціханоўскую яе прэсавая служба.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG