Лінкі ўнівэрсальнага доступу

Расея не адмовіцца ад стаўкі на Лукашэнку, — расейскі эканаміст


Андрэй Заастроўцаў, кандыдат эканамічных навук, навуковы супрацоўнік Эўрапейскага ўнівэрыстэту ў Санкт-Пецярбургу, 26 лютага выступіў з дакладам «Беларусь: рух супраць плыні». Ён называе Беларусь пратэктаратам Расеі і лічыць, што для пасьпяховых зьменаў у Беларусі патрэбная дэстабілізацыя расейскай улады.

  • Цяперашняя Беларусь — пратэктарат Расеі. Гэта ня значыць, што беларускае кіраўніцтва цалкам несамастойнае. Яно можа канфліктаваць па шэрагу пытаньняў са сваім «апекуном», але Лукашэнка ня можа сысьці на Захад.
  • Расея падтрымлівае «сацыяльна блізкіх» — тыя краіны і тэрыторыі, дзе ўсталяваліся падобныя да расейскай палітыка-эканамічны мадэлі. Пакуль Расея захоўвае цяперашні эканамічны і вайсковы патэнцыял, спробы памяняць такую мадэль выклічуць расейскае ўмяшаньне з імавернасьцю, блізкай да 100 працэнтаў.
  • У рамках расейскага сілавога поля амаль немагчыма пабудаваць пасьпяховую эканоміку, ня кажучы ўжо пра дэмакратычныя інстытуты.
  • Дапушчэньні, што Расея хацела б замяніць адыёзнага Лукашэнку на ўмоўнага Бабарыку ці Цапкалу, неабгрунтаваныя. Бо, паводле лёгікі Крамля, далейшыя працэсы можа пайсьці ў кірунку свабоднай рынкавай эканомікі і прававой дзяржавы. І нават калі новыя кіраўнікі будуць рабіць палітычныя паклоны Крамлю, Масква будзе сумнявацца, ці ўтрымаюць яны статус-кво, які задавальняе Расею. Калі будзе зьмяняльнасьць улады, дык няма гарантыі, што іх потым ня зьменіць празаходні лідэр, ці яны самі не адыдуць ад крамлёўскай лініі ў працэсе кіраваньня.

  • Існуе вузкая кааліцыя тых, хто атрымлівае выгады ад рэжыму ўнутры Беларусі — найперш кіраўніцтва буйных дзяржаўных прадпрыемстваў. Зьмена дыктатара на іншую сыстэму кіраваньня будзе для іх вялікай стратай.
  • Праваслаўе (пагатоў, што яно рэпрэзэнтаванае прыходамі РПЦ) ня ў стане працаваць на сувэрэнную дзяржаўнасьць. Трэба памятаць, што РПЦ ёсьць, па сутнасьці, ідэалягічным ведамствам Крамля.
  • Калі раптам у выніку палітычных узрушэньняў і раскладаў узьнікне такая магчымасьць, Расея не адмовілася б ад акупацыі балтыйскіх краінаў. Але пакуль такой магчымасьці няма, і ў Расеі ёсьць больш пільныя клопаты — утрымаць Беларусь, вярнуць у сваю арбіту Ўкраіну, Армэнію і Грузію.
  • Пакуль за кожным сілавіком Лукашэнкі стаяць цені некалькіх расгвардзейцаў, на ягоны сыход ставіць ня варта. Для пасьпяховых уцёкаў Беларусі на Захад з абдымкаў расейскай «братняй любові» спатрэбіцца, відавочна, сур’ёзная дэстаблізацыя ўлады ў самой Расеі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG