Лінкі ўнівэрсальнага доступу

Золатавалютныя рэзэрвы Беларусі за студзень скараціліся на 265 млн даляраў


Нацыянальны банк Рэспублікі Беларусь
Нацыянальны банк Рэспублікі Беларусь

Золатавалютныя рэзэрвы Беларусі за студзень скараціліся на 265 млн долараў, або на 3,5%, і на 1 лютага склалі 7 млрд 203,4 млн даляраў, паведамляе Нацыянальны банк.

Паводле інфармацыі рэгулятара, скарачэньне рэзэрваў абумоўлена пагашэньнем дзяржавай «вонкавых і ўнутраных абавязаньняў у замежнай валюце на агульную суму 410,6 млн долараў ЗША, а таксама зьмяншэньнем цаны на манэтарнае золата».

«Падтрыманьню ўзроўню золатавалютных рэзэрваў у студзені спрыяла паступленьне замежнай валюты ў бюджэт, у тым ліку ад продажу Міністэрствам фінансаў аблігацый, намінаваных у замежнай валюце», — удакладняе Нацбанк.

Рэгулятар нагадвае, што, згодна з асноўнымі кірункамі грашова-крэдытнай палітыкі на 2021 год, міжнародныя рэзэрвовыя актывы да канца году павінны скласьці не менш за 6 млрд долараў ЗША.

На мінулым тыдні першы намесьнік старшыні праўленьня Нацбанку Сяргей Калечыц на пашыраным пасяджэньні праўленьня адзначыў, што далейшае зьніжэньне рэзэрваў у 2021 годзе чакаецца ў сувязі зь неабходнасьцю выплат па дзяржаўным доўгу ў памеры 3,3 млрд долараў.

«У існых эканамічных умовах прагназаванае зьніжэньне золатавалютных рэзэрваў да велічыні, эквівалентнай ня менш як двум месяцам імпарту тавараў і паслуг, не нясе празьмерных рызык для макраэканамічнай стабільнасьці», — запэўніў першы намесьнік кіраўніка Нацбанку.

За 2020 год золатавалютныя рэзэрвы істотна скараціліся — на 1,9 млрд долараў ЗША, або на 20,5% (на пачатак 2020-га яны складалі 9,4 млрд долараў).

Летась рэзэрвы істотна зьніжаліся двойчы: у сакавіку — на 1 018,4 млн долараў, у жніўні — на 1 399,8 млн. Зьмяншэньне рэзэрваў было абумоўленае ростам дэвальвацыйных чаканьняў, якія, на думку эканамістаў, у сакавіку былі выкліканыя пандэміяй, а ў жніўні — палітычным крызісам.

На фоне ўзмацненьня дэвальвацыйных чаканьняў насельніцтва ў 2020 годзе купіла замежнай валюты на 1 969,8 млн долараў больш, чым прадало.

У кастрычніку беларускія ўлады, калі разьлічваліся па даўгах за газ, прыцягнулі крэдыт Эўразійскага фонду стабілізацыі і разьвіцьця на 500 млн долараў, што дазволіла крыху павялічыць золатавалютныя рэзэрвы.

Акрамя гэтага, у канцы сьнежня ў Беларусь паступіў першы транш на 500 млн долараў дзяржаўнага фінансавага крэдыту Расеі. Чакаецца, што другі транш на такую ж суму будзе пералічаны сёлета.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG