Рашэньне аб адстаўцы чакалася пасьля таго, як урад Контэ страціў абсалютную большасьць у Сэнаце. Гэта стала наступствам сыходу з ураду прадстаўнікоў партыі былога прэмʼера Матэа Рэнца праз спрэчкі аб стратэгіі барацьбы з каранавірусам і рэцэсіяй у эканоміцы.
Як пішуць італьянскія СМІ, Контэ спадзяецца сфармаваць новы кабінэт. Яго па-ранейшаму падтрымліваюць вядучыя партыі цяперашняй кааліцыі: папулісцкі Рух пяці зорак і левацэнтрысцкая Дэмакратычная партыя.
Прэзыдэнт пачне кансультацыі зь лідэрамі партый. Калі ўрад скласьці ня ўдасца, у краіне могуць прайсьці датэрміновыя выбары. За іх выступае правая апазыцыя — «Ліга» Матэа Сальвіні, якая раней уваходзіла ў кіруючую кааліцыю, але потым выйшла зь яе, і партыя Сыльвіё Бэрлюсконі.
Па апытаньнях, Контэ досыць папулярны, аднак ён беспартыйны і наўпрост не зьвязаны зь ніводнай з палітычных сілаў.
Па Канстытуцыі Італіі, абедзьве палаты парлямэнту фактычна раўнапраўныя — бяз большасьці ў Сэнаце ўраду практычна немагчыма дамагацца ўхваленьня неабходных законапраектаў.
