Заклапочанасьць падзялілі і шэраг дзяржаў. Так, Францыя з занепакоенасьцю даведалася пра арышт 18 студзеня Леаніда Судаленкі, чальца праваабарончай арганізацыі «Вясна» і ляўрэата прэміі Францускай Рэспублікі «Свабода, роўнасьць, братэрства» ў 2018 годзе.
«Мы заклікаем да яго неадкладнага вызваленьня і спыненьня ўсіх судовых перасьледаў чальцоў цэнтру „Вясны“, які летась стаў ляўрэатам прэміі Эўрапарлямэнту імя Сахарава. Францыя зноў заяўляе аб сваёй салідарнасьці зь беларускім народам і заклікае ўлады краіны пакласьці канец гвалту, перасьледу, арыштам палітычнага характару і пачаць рэальны дыялёг з усімі ўдзельнікамі беларускага грамадзтва», — адзначаецца на сайце францускага дыппрадстаўніцтва ў Менску.
ЗША таксама асудзілі арышт старшыні Гомельскага аддзяленьня «Вясны» Леаніда Судаленкі і валянтэркі Марыі Тарасенкі.
Іх затрымалі 18 студзеня ў межах крымінальнай справы паводле артыкулу 342 Крымінальнага кодэксу (арганізацыя ці падрыхтоўка дзеяньняў, якія груба парушаюць грамадзкі парадак, альбо актыўны ўдзел у такіх дзеяньнях). Статус затрыманых, а таксама частка артыкулу застаюцца невядомымі. У выпадку прызнаньня віны ім пагражае да 3 гадоў турмы.
«Мы заклікаем беларускія ўлады спыніць рэпрэсіі і жорсткія парушэньні правоў чалавека ў дачыненні да мірных дэманстрантаў, а таксама неадкладна вызваліць усіх несправядліва затрыманых. Гэтыя дзеяньні супярэчаць абавязаньням, узятым на сябе беларускім урадам як дзяржавай-удзельніцай АБСЭ. Мы заклікаем улады вызваліць сотні праваабаронцаў, журналістаў, мірных дэманстрантаў. Гэта найважнейшы, неабходны пачатковы крок на шляху да павагі патрабаваньняў беларускага народу аб асноўных свабодах і імкненьня выправіць сытуацыю ў краіне», — гаворыцца на сайце амэрыканскай амбасады ў Менску.
Абсэрваторыя ў абароне праваабаронцаў і Сусьветная арганізацыя супраць катаваньняў выступілі з заявай, у якой таксама асудзілі затрыманьне Леаніда Судаленкі і яго памочніцы Марыі Тарасенкі.
У звароце таксама згадваецца пра перасьлед Андрэя Аляксандрава і Ірыны Злобінай, затрыманых паводле аналягічных абвінавачаньняў за дапамогу ахвярам рэпрэсій.
«Абсэрваторыя разглядае гэта як непасрэдную пагрозу ўсім арганізацыям, якія займаюцца законнай праваабарончай дзейнасьцю ў Беларусі, дапамагаючы ахвярам жорсткіх рэпрэсій, якія працягваюцца ў краіне. Мы асуджаем затрыманьні Леаніда Судаленкі, Марыі Тарасенкі, Андрэя Аляксандрава і Ірыны Злобінай, мэтай якіх зьяўляецца выключна помста за іх законную праваабарончую дзейнасьць», — канстатуецца ў супольнай заяве.
