Лінкі ўнівэрсальнага доступу

Бацьку палітзьняволенай Марыі Калесьнікавай 5 разоў адмовілі ў спатканьні з дачкой


Марыя Калесьнікава, архіўнае фота.

Аляксандар Калесьнікаў падзяліўся тым, што піша ягоная дачка Марыя ў сваіх лістах з жодзінскай турмы.

Бацька палітзьняволенай Марыі Калесьнікавай расказаў, што дачка, нягледзячы на знаходжаньне ў сьледчым ізалятары, прыдумала яму падарунак на дзень народзінаў.

У паштоўцы з падмаляваным сэрцайкам Марыя Калесьнікава, па словах бацькі палітзьняволенай у інтэрвію тэлеканалу «Дождь», напісала:

«Любімы татачка, з днём нараджэньня. Трымайся і беражы сябе з усіх сіл. Вельмі цябе люблю. Усё будзе добра. Абдымаю і цалую. Твая Маша».

Аляксандар Калесьнікаў адзначыў, што носіць усе лісты з сабой і яны яго «саграваюць». Інтэрвал прыходу лістоў складае 10-12 дзён. Марыя піша пазытыўна, цікавіцца здароўем і настроем бабулі, дзядулі, іншых сваякоў. Сама адзначае, што справіцца з выпрабаваньнямі.

«Тата, што б ні здарылася, ты ведаеш, што я моцная, я ўсё вытрываю. Усе нягоды», – такую фразу Марыя Калесьнікава вымавіла ў размове з бацькам за некалькі дзён да свайго арышту.

Бацька Марыі Калесьнікавай пяць разоў спрабаваў сустрэцца з дачкой у ізалятары, аднак кожны раз яму адмаўлялі і тлумачылі, што да суду сваякам наогул рэдка дазваляюць спатканьні са зьняволенымі.

Марыя Калесьнікава была затрыманая ў ноч на 8 верасьня. 16 верасьня ёй было прад’яўлена абвінавачаньне ў публічных закліках да захопу дзяржаўнай улады або гвалтоўнага зьмяненьня канстытуцыйнага ладу.

Неўзабаве прадстаўніцу перадвыбарчага штабу экс-кандыдата ў прэзыдэнты Віктара Бабарыкі прызналі палітзьняволенай. 6 лістапада Калесьнікаву адмовіліся вызваліць пад заклад і падоўжылі арышт да 8 студзеня.

Адвакатка Калесьнікавай Людміла Казак паведамляла пра перабоі ў ліставаньні са зьняволенай. Таксама вядома, што ў Калесьнікавай забралі кнігі, якія былі ў яе ў камэры.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG