Лінкі ўнівэрсальнага доступу

Беларуску са Швайцарыі судзяць за нібыта сарваную зь міліцыянта балаклаву


3 сьнежня пачынаецца суд над беларускай са Швайцарыі Натальляй Хершэ, якую абвінавачваюць у супраціўленьні супрацоўніку міліцыі пры выкананьні ім службовых абавязкаў. Паводле афіцыйнай вэрсіі, Натальля зьняла балаклаву зь міліцыянта, за гэта на яе і завялі крымінальную справу.

Беларуска Натальля Хершэ стала жыве ў Швайцарыі цягам 12 гадоў. Там жа жывуць яе дарослыя дзеці. Калі сарваўся адпачынак, які Натальля з мужам Робэртам хацела правесьці ў цёплых краінах, вырашыла прыехаць на радзіму і пабачыць на ўласныя вочы, што адбываецца ў Беларусі.

Пасялілася ў Менску ў сяброўкі. Хадзіла на акцыі пратэсту ў Менску і Маладэчне, дзе жыве яе брат Генадзь. Плянавала пагасьціць на радзіме пару тыдняў, а засталася тут надоўга.

Натальля Хершэ (у белых джынсах) у счэпцы перад затрыманьнем на жаночым маршы 18 верасьня ў Менску
Натальля Хершэ (у белых джынсах) у счэпцы перад затрыманьнем на жаночым маршы 18 верасьня ў Менску

Затрымалі спачатку на 15 сутак, пасьля завялі крымінальную справу

Натальлю Хершэ затрымалі на жаночым маршы 19 верасьня ў Менску. Тады каля гандлёвага цэнтру «Айсбэрг» на скрыжаваньні вуліц Сурганава і Якуба Коласа былі жорсткія затрыманьні жанчын. Натальля трапіла на фота некалькіх карэспандэнтаў.

Спачатку жанчыну пасадзілі на 15 сутак паводле артыкулу 23.34 — за ўдзел у несанкцыянаваным мерапрыемстве. Зьмясьцілі на Акрэсьціна. А потым завялі крымінальную справу за супраціў супрацоўніку ўнутраных спраў з прымяненьнем гвалту (артыкул 363.2 Крымінальнага кодэксу) — за тое, што яна нібыта сарвала балаклаву з амапаўца.

У «Валадарцы» шасьцёра — у камэры на чацьвярых

Амаль два месяцы жанчына правяла ў жодзінскай турме № 8, а тыдзень таму, перад судом, Натальлю Хершэ перавялі ў менскі СІЗА № 1 на Валадарскага. Пра гэта расказаў Свабодзе брат Натальлі Генадзь, які жыве ў Маладэчне. Раней ён працаваў доктарам, цяпер у фармацэўтычнай кампаніі.

«Трымаецца Натальля вельмі стойка. Сапраўдная змагарка — як Марыя Калесьнікава, зь якой сястра перасякалася ў жодзінскай турме.

Умовы на Валадарцы яшчэ горшыя, чым у Жодзіне. Камэра разьлічаная на чатыры чалавекі, а ў ёй трымаюць шэсьць. Пяць жанчын кураць, а Натальля не. І для яе гэта вельмі цяжка. Пра гэта мне расказала сёньня адвакатка, якая наведала сястру апошні раз перад судом», — кажа Генадзь.

Скарга ад Натальлі Хершэ, якую яе сукамэрніца, арыштаваная адвакатка Людміла Казак, напісала на кавалку тканіны
Скарга ад Натальлі Хершэ, якую яе сукамэрніца, арыштаваная адвакатка Людміла Казак, напісала на кавалку тканіны

Спачатку з Натальляй працавала адна адвакатка, але яна захварэла на COVID-19 і перадала справу сваёй каляжанцы (таксама зь Менскай абласной калегіі адвакатаў), працягвае Генадзь.

«Яны вельмі добра паладзілі, новая адвакатка ўжо двойчы за апошні тыдзень сустракалася з Натальляй у СІЗА на Валадарскага. Літаральна гадзіну таму я зь ёй размаўляў. Адвакатка кажа, што размова была вельмі канструктыўная, яны разам выпрацавалі тактыку для суду», — паведаміў Генадзь.

У Жодзіне Натальля сустрэлася з журналісткай Кацярынай Андрэевай

Адвакатка расказала брату Натальлі, што ў апошнюю ноч у Жодзіне да яе ў камэру прывялі журналістку Кацярыну Андрэеву. Яны пасьпелі крыху пагаварыць, Каця расказала Натальлі апошнія навіны з волі. Але турэмнікі вельмі хутка зарыентаваліся, што дзяўчаты — аднадумцы, і перавялі Кацярыну Андрэеву ў іншую камэру.

Апошнім часам лісты сталі даходзіць да Натальлі, і брат пачаў пісаць часьцей, «часам на беларускай мове».

«Апошні ліст быў на 8 старонках фармату А4. Заўсёды адпраўляю іх заказнымі. Дык вось, у апошні дзень у Жодзіне ў камэру прыйшоў турэмнік і паведаміў, што Натальлі прыйшла заказная карэспандэнцыя. А яе павялі ў амбуляторыю. Калі Натальля вярнулася, суседкі абрадавалі яе, што прыйшло два ліста. Але ў выніку Натальлі так і не аддалі іх. Яна вельмі засмуцілася і мне ў апошнім лісьце з жодзінскай турмы напісала, што гэта сваволя і зьдзек. А вось ці даходзяць на Валадарку мае лісты, я ня ведаю», — кажа брат Натальлі.

Ён спадзяецца на судзе ўпершыню за апошнія два з паловай месяцы ўбачыць сястру. Марыць перадаць ёй кнігу Оруэла «1984».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG